Atty. Mikel Rama gitudlo nga mohulip ni Hontiveros
CEBU, Philippines — Opisyal nga gi-nominate sa konseho sa Dakbayan sa Sugbo ang anak ni dismissed Cebu City Mayor Michael Rama nga si Atty. Mikel Francisco Rama aron maoy mohulip sa bakante nga posisyon sa ika-16 nga Sangguniang Panglungsod nga gibiyaan ni mayor Donaldo Hontiveros.
Kini human nga hingpit nga gidawat ni Donaldo Hontiveros ang katungdanan isip bise mayor sa siyudad human nga nahimong mayor si Raymond Alvin Garcia tungod sa pagkasuspenso ni Rama. Atol sa regular session kagahapong adlawa, Oktubre 23, 2024, gi-presentar ni Konsehal Philip Zafra ang iyang nominasyon ngadto sa konseho ug dali kining giaprobahan.
“Atty. Mikel Francisco Rama is not only qualified individual but also one who brings with him the right combination of knowledge, experience, and a heart for public service”, suma pa ni Zafra atol sa iyang privilege speech.
Dako usab ang pagsalig ni Zafra nga haom si Atty. Mikel Rama sa maong posisyon gumikan kay gawas nga aduna kini kaalam sa balaod, natudluan ug nagiyahan na sab kini sa iyang amahan kinsa nangalagad sa siyudad sulod na sa tulo ka dekada.
“Mikel has witnessed firsthand the challenges and triumphs of leadership, public service, and governance. He has learned not just from the books and the law but from a mentor who has dedicated his life to the service of the people of Cebu City”, dugang pa ni Zafra.
Si Atty. Rama mao ang kinamaguwangan nga anak ni dismissed Mayor Rama ug miduso kini sa iyang Certificate of Candidacy alang sa 2025 midterm elections niadtong Oktubre 3 ubos sa partido sa iyang amahan nga mao ang Partidu BARUG – BagOng Sugbu. (BANAT NEWS)
- Latest
