100 ka transitional houses tukoron sunod buwan

CEBU, Philippines — Mokabat sa 100 ka transitional housing units alang sa mga nawad-an og panimalay tungod sa Gubat sa Baha ang gikatakdang tukoron karong buwan sa Nobiyembre sa usa ka luna nga gipanag-iya sa Dakbayan sa Sugbo nga nahimutang sa Block 27 North Reclamation Area sa Dakbayan sa Sugbo.

Aron nga hingpit kini nga mapatukod, matud pa ni Konsehal Joel Garganeranga nga gikatakdang mopirma og kasabutan ang real estate developer nga SM Development Corp. (SMDC) ug ang Cebu Chamber of Commerce and Industry (CCCI) uban ni Mayor Raymond Alvin Garcia.

Gitug-an ni Konsehal Garganera nga napadaplin sa makadiyot ang maong proposal human nangayo og katin-awan ang konseho kung kanus-a sugdan ug asa gyud itukod ang mga transitional houses.

Gisaysay ni Konsehal Garganera nga niuyon na ang konseho nga motabang sa SMDC ug CCCI alang sa ilang donasyon.

“Ni compromise ang City Council nga dili lisudlisuron ang donor. Mohatag man ni sila. Ato nalang ibutang nga mohatag ni sila og 100 units, in a lot that is owned by Cebu City and in Cebu City. Sila pay mo donate, nganong hatagan paman nato og daghang problema” suma ni Garganera.

Gawas sa 100 ka transitional housing units nga i-donar sa SMDC ug CCCI, mogahin sab ang syudad og P600 milyones alang sa pagtukod og 1,000 ka transitional housing units.

Ang pundo alang sa pagtukod sa 1,000 ka housing units maggikan sa unang Supplemental Budget nga gipagawas sayo ning tuiga.

Unang natuki nga ibutang kini sa South Road Properties apan supak ang SRP Board gumikan kay dili haom ang pagbutang og transitional house tungod kay commercial area kini.

Kahinumduman nga una nang nanawagan si Division for the Welfare of the Urban Poor Executive Director Ronald Anthony “Butch” Librando nga kinahanglan na mo-bid out ang siyudad aron nga dili mabalik sa panudlanan ang pundo alang sa maong dakong proyekto. (BANAT NEWS)