Pesquera misaway sa plano nga pedestrianization

CEBU, Philippines — Misugyot ni Konsehal Jocelyn Pesquera nga daghan ang kinahanglan nga ikonsiderar kun ihinayon ang pedestrianization sa Osmeña Boulevard paingon sa Metro Colon ngadto sa Plaza Independencia sa Dakbayan sa Sugbo.

Giklaro ni Pesquera nga dili siya supak alang sa maong kalambuan sa syudad apan nagduhaduha siya sa maong ideya tungod kay maapektuhan gyud ang pipila ka mga negosyo ug ang heritage district ilabi na ang anaa nahimutang sa dalan Colon.

“Come to think about it, it’s a very small road and a major thoroughfare”, suma pa ni Pesquera kun diin napanglantawan niya nga kun ma-pedestrianized, mohunong sab ang economic activity sa maong dapit", suma pa ni Pesquera.

Gipasabot ni Pesquera nga naningkamot ang siyudad aron mapalagsik ang kalihokan sa negosyo sa dalan Colon apan masayang lang kini kung mapadayon ang pedestrianization.

“Pagkonsehal nako, nibalik sad ang business owners, asking me to help them because Colon was dying, we need to revitalize it. Look at Colon now? It’s coming back. Naa nay Iconique, naa nay Colonnade, naa nay Starbucks. To think nga atong gitabangan og revive ang Colon sa pag two-way nato, karun ila napud patyon”, suma pa ni Pesquera.

Dugang saway ni Pesquera sa mga nagpasiugda sa pedestrianization mao ang kabahin sa sugyot nga ipaila-ila ang mga electric tricycle o e-trikes sa heritage district sa dakbayan. Matud pa niya nga mas kinahanglan nga i-promote ang pagbaktas kaysa pagpabutang og mga e-trikes.

“If you want pedestrianization, then imuhang i-promote walking. Not put another vehicle and the City will spend. Why put another vehicle dayun magbayad ra sad ang mga tawo? Kung ako’y owner, naa man koy sakyanan, nganong pasakyon paman ko og laing sakyanan dayun mobayad ra ko?” segun ni Pesquera.

Kahinumduman nga miingon ang pangu sa City Planning and Development Office nga si Joseph Michael “Yumi” Espina nga makatabang ang e-trike sa pagdala sa mga lokal ug langyaw nga turista sa heritage district sa dakbayan ug makonektar usab kini sa “Link to the Port” nga mao ang usa ka gi-feature sa Cebu Bus Rapid Transit Project.

Tumong sa pedestrianization sa downtown district mao ang dili lang sa pagpalagsik sa mga lokal nga negosyo didto kon dili sa pagbukas sa heritage areas sa Colon Street ngadto sa mas daghang pedestrian kaysa mga sakyanan. (BANAT NEWS)