Tanod patay sa ‘banakon’

CEBU, Philippines — Patay ang usa ka barangay tanod nga  gituohang gipaak og halas o bitin samtang nagtubag sa sugo sa lawas diha sa Purok 4, Barangay Toyokon, Lungsod sa Aloguinsan niadtong Lunes sa kaadlawon, Oktubre 21, 2024.

Ang namatay mao si Juffer Jorda  Alpobera, 33, nagpuyo sa maong dapit.

Sa impormasyon sa Aloguinsan Police Station, ang asawa niini nga si Annabelle mao ang nakadiskubre nga patay na ang iyang bana nga iyang tupad sa pagkatulog tibuok gabii.

Gipukaw  unta kini sa asawa sayo sa buntag apan nakurat nalang kini kay giingong nigahi na sa gihigdaan ug wala nay kinabuhi.

Ang asawa  nitug-an ngadto sa kapulisan nga nigawas ang iyang bana ala-una sa kaadlawon kay nitubag sa sugo sa lawas.

Posible matud pa pagtungko sa kasilyas gipaak na kini sa gituohan nilang bitin apan wala nakabantay ug gatuo nga nasangit lang tungod kay nanghaplas ra kini pagbalik sa balay.

Wala matud pa mosulti ang biktima ngadto sa iyahang asawa kun naunsa kini sa iyang paggawas. 

Dunay nakita nga gagmay'ng pinaakan sa liog niini apan walay nakakita kun unsay nakapaak, apan dunay mga pagduda nga kini banakon.

Ang banakon usa ka matang sa bitin nga susama og dagway sa kobra apan dili kini klase sa kobra.

Moabot kini hangtud lima ka metros ug gikonsiderar nga pinakataas nga “venomous snake” sa kalibotan.  Usa sa mga pagkaon niini mga kaparehas niyang mga bitin, apil na ang kobra.

Wala na gipa autopsy sa pamilya ang patay'ng lawas kay kumbinsido sila nga wala'y foul play nga nahitabo.  IBM BANAT NEWS