Babayeng 'carnapper' nadakpan sa HPG-7

CEBU, Philippines — Nagabot-abot sa buhatan sa Highway Patrol Group (HPG)-7 ang lima ka mga biktima sa “rent-tangay” modus operandi human nadakpan ang nagpaluyo niini nga usa ka babaye.

Ang nadakpan usa ka babaye nga giila lang sa ngalan nga Dennis, giingong maoy tig-deal sa mga kinawat nga sakyanan. Ang gitumbok nga agalon niini mao ang usa ka France Ong nga padayon pang gipangita.

Usa sa mga nabiktima mao ang nag buy and sell nga nangangkong nakapalit  og tulo ka sakyanan gikan sa duha  sa kantidad lang og kapin P1 million.

Nainteresado siya kay barato ra kay mahulog og tag P430 mil ngadto sa P470 mil kada unit.

Apan uwahi na niya nahibaw-an nga kinarnap kini sa dihang gipasusi niya sa Land Transportation Office (LTO)-7.

Laing biktima mao ang babaye ug lalaki nga nagpaabang og sakyanan apan wala na iuli kanila ug nahibaw-an nalang nga gibaligya na kini og P430 mil.

Laing nakapalit sab og kinawat nga sakyanan niadto lang adlaw nga Domingo, Oktubre 20, 2024 ang igo nalang sab sa pagmahay.

Naengganyo siya kay sakto ra ang presyo ug wala siya magduda nga kini kinawat kay dili mahal apan di sab barato pagkabaligya unya kompleto tanan ang papeles.

Apan sa dihang gidala na niya ang sakyanan dunay nanawag niya ug nagpahibawo nga kinawat ang sakyanan nga iyang napalit hinungdan nidiretso siya sa HPG-7.

Ang mga biktima miingon nga usa ka France Ong ang ilang naka-transaksyon.

Ang hepe sa HPG-7 Police Lieutenant Colonel Wilbert Parilla, nihimo og operasyon ug nadakpan ang kauban ni France Ong nga si Dennis, 27, taga Bulacan.

Gihulagway ni Parilla nga si Dennis maoy tig-deal sa mga sakyanan nga kinawat. Nasuta sab nga daghan na kini og susamang kaso sa ubang mga lugar dili lang dinhi sa Central Visayas ug nadakpan na kaniadto apan nakapiyansa.

Ang suspetsado nihimakak nga siya karnaper apan gitumbok niini si France Ong nga mi-recruit niya didto sa Manila ug napugos siya sa pagsugot ug kuyog niini kay nasakit ang iyahang anak.

Kasong large scale estafa ug carnapping ang ipasaka batok sa suspetsado. IBM BANAT NEWS