Mga biyahe sa barko gikansela gumikan sa bagyong Kristine

CEBU, Philippines — Ang bagyong Kristine bisan pa nga dili kini direktang moigo sa Sugbo apan magdala gihapon kini og pag-ulan hangtud sa adlaw nga Miyerkules, Oktubre 23 base sa taho sa Philippine Atmospheric Geophysical and Astronomical Services Administration (PAGASA).

Kini gumikan sa hinungaw sa bagyo nga maoy hinungdan sa pag-ulan.

Matud ni Jhomer Eclarino, weather specialist sa PAGASA-Mactan nga ang epekto niini mao ang matag karon ug unya nga pag-ulan nga posibleng hinungdan sa pagbaha ug pagdahili sa yuta.

Base sa alas 11:00 sa buntag nga weather bulletin sa PAGASA kagahapon, Oktubre 21 nga ang sentro sa bagyong Kristine anaa sa 870 kilometro sa sidlakang bahin sa Eastern Visayas diin nagdala kini og hangin nga 55 kilometro matag takna ug paghuros nga moabot sa 70 kilometro matag tagsa.

Ang maong bagyo nag-irog padulong sa kasadpang habagatang-kasadpan.

Ang PAGASA nipaubos sa tropical cyclone wind signals number 1 sa Catanduanes, Masbate lakip ang Ticao Island ug Burias Island, Camarines Sur, Albay, Sorsogon, Camarines Norte ug sidlakang bahin sa Quezon nga gilangkuban sa Tagkawayan, Guinayangan, Buenavista, San Narciso, San Andres. Sa Visayas, ang Eastern Samar, Northern Samar, Samar, Leyte, Biliran, ug Southern Leyte ang ubos sa signal number 1 samtang ang Dinagat Island ug Surigao del Norte apil ang Siargao- Bucas Grande Group ang lakip sa tropical cyclone wind signal.

Kagahapon pipila ka biyahe sa barko ang kanselado apil na niini ang Cebu padulong sa Dipolog City pinaagi sa Medallon Shipping; Cebu padulong sa Calbayog, Maasin ug Surigao nga biyahe sa Cokaliong; Maya Port padulong sa Matnog Port pinaagi sa Lite Ferry; Cebu padulong sa Ormoc nga biyahe sa Oceanjet ug Supercat; Cebu padulong Hilongos nga biyahe sa Gabisan Shipping, ug Cebu padulong Calbayog / Masbate sa KHO Shipping. (BANAT NEWS)