DSWD nag-awhag og suporta pagwagtang sa child labor
CEBU, Philippines — Giawhag sa Department of Social Welfare and Development (DSWD) Central Visayas ang mga lokal nga kagamhanan nga suportahan ug sundogon ang ilang proyekto nga "SHIELD Against Child Labor," nga nagtumong sa pagwagtang sa child labor sa mga komunidad.
Ang Strategic Helpdesks for Information, Education Livelihood, and other Developmental Interventions (SHIELD) o "SHIELD Against Child Labor" nga proyekto usa ka kontribusyon sa DSWD sa RA 9231, o ang Elimination of the Worst Forms of Child Labor Act.
Nagtinguha kini sa paghimo og lokal nga rehistro aron mailhan ang mga child laborers, pag-establisar og mga barangay help desks alang sa mga taho ug pag-access sa mga serbisyo gikan sa lain-laing ahensya.
Gikumpirmar ni Regional Director Shalaine Marie S. Lucero ug sa Department of Labor and Employment (DOLE), ang Central Visayas usa sa mga rehiyon diin taas ang kaso sa child labor. Matud ni Lucero, ang mga bata makit-an nga nagtrabaho sa kadalanan, plantasyon, pabrika, domestic workers, ug bisan sa sexual exploitation.
Atol sa holidays, sagad silang gigamit sa seasonal nga trabaho sama sa firecracker production ug pagpamaligya og holiday ornaments.
Gipasabot ni Lucero nga ang kakabos ug limitadong access sa edukasyon maoy nag-unang rason nganong ang mga bata manarbaho sa sayong edad.
Ang DSWD nanawagan sa lain-laing LGUs ug aktibong nakig-alayon kanila aron masabtan nila ang konsepto sa proyekto. Sa pagkakaron, pito na ka LGUs ang nakig-alayon sa ahensya nga adunay mga agreement aron makopya ang proyekto.
Gawas sa tabang pinansyal, gihingusgan usab sa departamento ang ilang adbokasiya batok child labor, online sexual abuse o exploitation of children, ug uban pang matang sa human trafficking sama sa prostitusyon. (BANAT NEWS)
- Latest
