Transitional housing sa siyudad kinahanglan nga dalion

CEBU, Philippines — Gikinahanglan na nga mo-award ang kagamhanan sa Dakbayan sa Sugbo og bidder alang sa P600 milyones nga pundo nga gigahin alang sa transitional housing nga magsilbing puy-anan sa mga informal settlers.

Kini ang sugyot ni DWUP Executive Director nga si Atty. Ronald Anthony “Butch” Librando tungod kay suma pa niya nga mabalik sa panudlanan sa siyudad kung dili kini makapili sa katapusan ning tuiga.

“Gi-take up na namo siya kay ang among concern kay hapit na mo end ang year kay kahibaw baya mo basta maabtan ta og December, basin mo-end na ang budgeting ug dili na siya magamit kay ma-revert na balik sa general fund,” suma pa ni Librando.

Matud pa ni Librando nga andam na ang P600 milyones nga budget alang sa transitional housing nga gi-aprobahan sa konseho sa unang Supplemental Budget niadtong Marso ning tuiga.

Apan nalangay ang syudad sa pagsugod sa maong bidding kay kinahanglan pa nga maghimo og Terms of reference (TOR) alang sa maong proyekto.

Ang TOR usa ka dokumento nga naglatid sa mga parameters ug expectation sa procurement task o sa proyekto.

Matud pa ni Librando nga wala pa sab gyud makahimo og TOR ang siyudad tungod kay wala pa matino kung asa gyud ibutang ang proyekto.

Unang nasabutan nga tukuron ang mga transitional house sa bakanteng luna sa South Road Properties (SRP) apan nakahukom ang siyudad nga ibalhin ang project site niiini sa Block 27 sa North Reclamation Area.

Dugang ni Librando nga kinahanglan usbon ang project site human nga misupak ang SRP Board sa maong proyekto tungod kay adunay Land Use Plan ang SRP ug dili haom ang pagbutang og transitional house tungod kay commercial area kini. Tumong sa pagpatukod sa mga transitional house mao ang mahimong temporaryong puy-anan sa mga informal residents nga nawad-an sa ilang mga panimalay tungod sa nagpadayong mga programa sa siyudad sama sa Gubat sa Baha. (BANAT NEWS)