348 ka mga kalipikado sa housing program giduso sa DWUP
CEBU, Philippines — Moabot sa 348 ka mga pangalan ang gi-endorso sa Division for the Welfare of the Urban Poor (DWUP) isip kwalipikado nga benepisyaryo alang sa maka-avail kun makapahimulos sa National Housing for Filipinos (4PH) program.
Matud pa ni Atty. Ronald Anthony “Butch” Librando nga pwede na kini makapuyo dayon sa gi-propose nga 4PH site sa Barangay Pulangbato.
Kinahanglan lang nga mopaubos kini sa qualification process sa Department of Human Settlements and Urban Development (DHSUD).
“Ang process man gud ana kay gikan namo sa LGU, kami modawat sa mga applicants, amo i-submit sa DHSUD kay naa sad silay process didto ug ang DHSUD na ang mo-submit sa Pag-ibig”, suma pa ni Librando.
Dugang pa niya nga kasagaran sa mga benepisyaryo nga nakapasar sa inisyal nga qualification process sa DWUP mao ang mga nagpuyo sa bukirang bahin sa Dakbayan sa Sugbo.
Padayon usab ang DWUP sa pagdawat og mga aplikante aron nga maka-avail sa 4PH program diin plano usab nga matukod ang laing housing site sa laing bahin sa Barangay Pulangbato ug sa Barangay Budlaan.
Aron nga mahimong kwalipikadong benepisyaryo sa maong programa, ang usa ka miyembro sa pamilya kinahanglan adunay income bisan og P15,000 matag buwan ug kinahanglan aktibo kini isip miyembro sa Pag-ibig Fund ug aduna nay kontribusyon sulod sa duha ka tuig. (BANAT NEWS)
- Latest
