Honorarium sa mga magtutudlo nga moserbisyo s eleksiyon dugangan

CEBU, Philippines — Samtang nagpadulong ang 2025 midterm elections, ang Department of Education sa Central Visayas (DepEd)-7 hingpit na nga nipaandam sa mga magtutudlo ug mga non-teaching personnel nga mahimong poll workers.

Ang DepEd-7 nakig alayon na sa Commission on Elections (Comelec) alang sa angay andamon na rekisitos ug mga papeles kabahin sa mga magtutudlo nga mo alagad sa ilang serbisyo sa umaabot nga eleksiyon.

Matud ni DepEd-7 regional director Salustiano Jimenez nga pursigido siya nga mapatuman ang pagdugang sa “monetary compensation” ug sa pagpuno sa “service credits” ngadto sa mga magtutudlo base sa ilang aktuwal nga adlaw ug oras sa serbisyo.

Si Jimenez nagkanayon nga ang regional office sa DepEd kay hugot nga moduso sa husto nga suholan alang sa mga magtutudlo ilabi na sa ilang oras nga i-render.

Sa laing bahin, si Senate Minority Leader Aquilino Martin “Koko” Pimentel III nipaabot sa Kongreso nga kinahanglang tan-awon ang pagtaas sa honoraria, allowances, ug proteksiyon nga benepisyo alang sa mga magtutudlo ug poll workers sa gisugyot nga national budget alang sa tuig 2025.

Gihisgotan ni Pimentel ang mga kabalaka nga gipadayag sa poll workers kabahin sa tax deductions gikan sa ilang honoraria.

Niadtong 2022 national ug local elections ang mga magtutudlo nga naapil sa maong buluhaton nakadawat og mga honoraria subay sa Resolution No. 10727 nga giisyu sa Commission on Elections (Comelec).

Ang chairpersons sa electoral boards nakadawat og Php 7,000; ang mga miyembro sa election board nakadawat og Php 6,000; ang mga DepEd supervisors nakadawat og Php 5,000, ug ang mga support staff nakadawat og Php 3,000.  Apan ang tanan niini nga kantidad gimenosan sa 20 porsyento sa tax.

Gawas sa monetary compensation, si Jimenez nipasabot nga sa niaging mga eleksiyon nagpatuman sila og legal counsel alang sa mga magtutudlo aron maprotektahan sila gikan sa bisan unsang hagit o isyu nga mahimong motumaw samtang nagsunod sila sa ilang electoral duties.

Kasamtangan nga ang school division offices (SDO) nagsugod na sa pag-ila sa mga magtutudlo nga magaserbisyo sa nagkalain-laing kapasidad.

Samtang wala pa’y pormal nga tigom tali sa opisyales sa Comelec, si Jimenez positibo nga ang tanan nga koordidnasyon maangkon sa maayong paagi. (BANAT NEWS)