20 ka mag-uuma sa Bohol gibansay kabahin sa pagpanguma

CEBU, Philippines — Ang Department of Agriculture-Central Visayas (DA-7) nipahigayon og duha ka adlaw nga pagbansay-bansay kabahin sa kahimsog sa yuta ug conservation practices alang sa 20 ka mag-uuma nga miyembro sa Masayag Farmers Association sa Guindulman, Bohol.

Kini nga inisyatiba, ubos sa Rice Program, nagtinguha nga mapalambo ang Agri-Ecology-based nga pagpanguma og humay sa rehiyon.

Si Asteria B. Dela Peña, ang presidente sa Masayag Farmers Association nipadayag sa iyang pasalamat sa gihatag nga kahibalo tungod kay kini makapauswag sa ilang mga gawi sa pagpanguma.

Si Edwin Golosino, miyembro sa Board of Directors sa maong asosasyon miingon nga tungod sa soil testing nahibaw-an niya nga kulang sa nitrogen ug potassium ang yuta nga iyang giuma, busa sa sunod nga cropping season mogamit na sila og angay nga abuno sa ilang mga tanom.

Samtang si Matias S. Tinampay, presidente sa Tubod Wangag Farmers Association, misaad nga iyang ipaambit ngadto sa mga miyembro sa iyang asosasyon ang iyang nakat-onan sa pagbansay-bansay kabahin sa proper soil sampling, soil testing, ug proper contour line creation.

Ang pagbansay-bansay naghisgot sa mga sukaranan sa yuta, mga klase sa yuta sa Bohol, importansya sa kahimsog sa yuta, mga teknik sa sampling, contour farming, ug paggamit sa abono.  Sa laing bahin gitinguha sa usa ka private Lawyer Atty. Jordan Pizarras ang tigpanalipud sa mga Bol-anon sa pagpasiugda sa modernisasyon sa sektor sa agrikultura.

Si Pizarra nagpasiugda sa pagtukod sa mga agricultural High School sa mga nag-unang lungsod sa distrito aron matabangan ang pagbag-o sa mga pamaagi sa pagpanguma ug paghatag ug gahum sa lokal nga mag-uuma.

Hatagan ug gibug-aton ni Pizarra ang mga tunghaan nga maghatag og mahinungdanon nga pagbansay-bansay alang sa kabatan-onan nga naghatag kanila sa mga modernong teknolohiya sa pagpanguma alang sa kaugmaon sa agrikultura sa Bohol.  Pinaagi sa pagsagop sa mekanisasyon ug paghatag ug puhunan sa edukasyon, dako ang pagtuo ni Pizarra nga ang Bohol ug tibuok nasud makapalambo sa produksyon sa agrikultura.