Bisitang babaye gibulit og dunggab

CEBU, Philippines — Napalgan nga wala nay kinabuhi ang usa ka babaye nga dunay mga samad dinunggaban sa kalawasan diha sa Barangay Victoria, Lungsod sa Remigio, Probinsiya sa Sugbo kagahapon sa kaadlawon, Biyernes, Oktubre 18, 2024.

Nailhan ang biktima nga Jocelyn Ababa, lumad nga taga Lungsod sa Vallehermoso, Probinsiya sa Negros Oriental.

Nagkanayon si Police Captain Phil Restauro, hepe sa San Remigio Police Station nakadawat sila og tawag gikan sa concerned citizen labot sa nakit-ang patay’ng lawas sa babaye.

Gani gatuo sila nga gilabay didto apan nasuta nila nga kun asa kini nakit-an didto sab kini matod pa gipatay tungod kay ang hinagiban nga gigamit sa pagpatay sa biktima naa ra sab sa dapit ug dunay mga indikasyon nga diha ra kini gipatay.

Ang kapolisan adunay tulo ka mga tawong gidudahan nga ilaha na karong gisubay. Naabot matod pa ang biktima sa lugar tungod kay naa kini amiga  nga taga didto ug nilakaw kini apan wala na mahibaw-an og asa niadto.

“Base sa estorya sa atong investigator wala gyud sila’y nahibaw-an, na found out nalang later on nga naay nakit-an patay didto,” dugang ni Restauro.

Padayon pa nga gi-contact sa kapulisan ang pamilya sa biktima sa Lungsod sa Vallehermoso. IBM BANAT NEWS