Manag-amahan nasangit sa delivery van

CEBU, Philippines — Nalandig sa tambalanan ang manag-amahang nagmotorsiklo huma sila nasangit sa delivery van sa national highway sa Barangay Calajoan sa lungsod sa Minglanilla niadtong Huwebes sa hapon. Ang amahan nga maoy nagmaneho sa motorsiklo ang nakaangkon og gisi sa iyang kamot samtang nabuak ang tuway-tuway sa tuhod sa iyang anak.  Nahibaw-an nga padung sa norte ang delivery van samtang padung sa habagatan ang nangaangol.

Apan nikalit lang nga ni counterflow ang nagmotorsiklo ug nasangit ang tuhod sa anak ngadto sa delivery van hinungdan sa ilang pagkatumba.

Nisarasay ang duha ug swerte nga ang motorsiklo lang mao ang napasok sa ilawom sa wing van nga nagsunod sa delivery van nga nasangitan sa anak. Gituohan nga nagdali ang duha nga makaapas sa biyahe paingon sa Negros tungod kay taga Bacolod man ang duha. IBM BANAT NEWS