Nipatay sa nurse napasakaan na og kaso

CEBU, Philippines — Napasakaan na og kasong murder ug physical injury ang 31 anyos nga lalake nga nidunggab patay sa nurse gamit ang gunting sa Bohol Doctor’s Hospital sa Barangay Bool, Lungsod sa Tagbilaran, Probinsiya sa Bohol.

Kahinumduman nga samtang giatiman sa 51-anyos nga nurse ang suspek aron makagawas na sa tambalanan nikuha matud pa sa gunting sa nurse station ang suspek ug gidunggab ang nurse sa nagkadaiyang parte sa lawas niini.  Nasamdan sab ang usa ka utility worker kay giapil og dunggab sa dihang misuway og tabang sa nurse. Gikatahong nasuko ang suspek kay wala makauyon sa gipanulti sa nurse nganha kaniya.

Apan nagmahay matod pa ang suspetsado ug nangayo kini og pasaylo apan makita sa nawong niini nga wala’y emosyon ug blanko.

Ang nurse dunay duha ka nabiyaang mga anak nga nag-edad og 16 anyos ug 10 anyos.   “Fatal kay liog murag naay duha ka samad sa liog and then naay samad sa dughan diri sa chest gyud then naa pud sa bukton ug kamot siguro katong sa bukton ug kamot mga defense wounds,” sigon ni Police Lieutenant Colonel John Kareen Escober, hepe sa Tagbilaran City Police Station. IBM BANAT NEWS