Garcia gipasakaan og kaso sa Ombudsman

CEBU, Philippines — Si kanhi customs commissioner ug mayoralty aspirant Yogi Ruiz niduso og reklamo batok kang Cebu City Mayor Raymond Alvin Garcia ug kang Engineer Norvin Imbong, project manager sa Cebu Bus Rapid Transit ngadto sa buhatan sa Ombudsman Visayas niadtong Huwebes human nga wala hatagi og pagtagad sa iyang panawagan sa pagsusi sa “Link to Port” Project diha sa Osmeña Boulevard.

Matud ni Ruiz nga ang pagpasang-at niya og kaso walay bulok politika diin alang lang kini sa kaayohan sa mga tawo nga posibleng madisgrasya sa maong proyekto nga wala niagi og public consultation.

Ug giingong nasayran ni Ruiz nga ang maong proyekto  kuwang kini sa permit ug clearances gikan sa konseho.  “Again, I am not painting this concern with any political colors, I am doing this as an ordinary Cebu City resident and as a simple taxpayer. Kung way magpakabana ani, apektado tang tanan”, padayag ni Ruiz.

Gibutyag ni Ruiz nga tulo ka buwan na niya nga gitun-an ang maong problema sa CBRT human siya makadawat sa mga reklamo gikan sa mga magpapatigayon nga anaa sa maong lugar diin nakaapekto kini sa ilang mga negosyo.

Si Ruiz niawhag sa Ombudsman Visayas sa pagpasuspenso kang Garcia ubos sa Section 9, Rule III sa Ombudsman Administrative Order No. 07.

Gipadayag ni Ruiz nga kong limpiyo ang konsensiya sa maong mga opisyal ilahang tubagon ang reklamo nga giduso batok kanila ilabi na sa naunang isyu sa mga lamp posts nga giingong kabahin sa CBRT project nga nisangpot sa pagpasira sa 1.2 kilometro nga dalan sa P. del Rosario paingon sa Plaza Independencia.

Si Ruiz nagkanayon nga sa wala pa niya giduso ang iyang reklamo iyaha una kining gipadangat kang Garcia pinaagi sa sekretarya niini apan giingong wala kini magpakabana sa maong reklamo.

Nagtuo si Ruiz nga matubag kini dayon ni Garcia apan ang maong isyu gipahilom lang kini hinungdan nga naaghat siya nga mopasaka na og reklamo.

Samtang ni Garcia wala pa kini makadawat sa kopya sa maong reklamo nga giduso batok kaniya apan gihulagway kini sa ilang kampo nga adunay bulok politika ilabi na nga si Ruiz magpapili kini isip mayor sa siyudad sa sunod tuig nga eleksiyon. BDB BANAT NEWS