Nurse gidunggab sa pasyente
CEBU, Philippines — Patay ang usa ka nurse samtang samdan ang utility worker sa usa ka pribadong ospital diha sa Barangay Bool, Tagbilaran City, Probinsya sa Bohol human sila gipangdunggab sa ilang pasyente kagahapon sa buntag, Oktubre 17, 2024.
Ang nurse nga namatay usa ka 51 anyos nga babaye, nagpuyo sa 0801-C J.A Clarin St., Barangay Dao, Tagbilaran City samtang ang samdan mao ang utility worker nga 21-anyos nga lalake, residente sa Purok 4, Barangay Cainsican, Lungsod sa Inabanga, Bohol.
Samtang ang suspek nga pasyente mao si Marlito Linguis, 31, molopyo sa Purok 4, Barangay Magsaysay, Lungsod sa Sevilla, Bohol.
Nagkanayon si Police Lieutenant Colonel John Kareen Escober, hepe sa Tagbilaran City Police Station nga gidunggab sa suspek ang duha samtang giproseso na ang papeles niini aron makagawas na sa tambalanan kagahapon sa buntag.
Ang suspek nalandig sa tambalanan human nalanag sa gikaon ang dinugoan.
Matud pang Escober, kalit lang nga gikuha sa suspek ang nakit-ang gunting ug walay daghang estorya, gidunggab niini ang liog ug lawas sa maong nurse, nakaangkon sab ang biktima og samad dinunggaban sa iyang kamot nga maoy nakaingon sa kamatayon niini.
Ang utility worker nga diha sa duol pagkakita sa gibuhat sa suspek misuway og santa kaniya apan gisunod kini sa pagdunggab.
Giingon nga dunay gikalagotan ang suspek sa mga estorya sa maong nurse maong nabuhat niya ang maong krimen. Wala sab kini motug-an sa kapolisan kun unsa kadto nga nagtukmod niini sa pagpatay sa biktima.
Human niini nabuhat ang krimen gilabay dayun sa suspetsado ang gunting, niluhod ug nitahan dayon sa nangabot nga mga gwardiya ug polis.
"Nagpakita siya og remorse pero mura man og blanko iyahang nawong, wala'y emosyon ba," sigon ni Escober.
Giangkon matud pa sa suspetsado nga drug surrederree kini niadtong tuig 2017, wala sab kini motug-an kun nagpadayon pa kining nigamit og illegal nga drugas.
Kasong murder ang ipasaka batok suspetsado kay base sa iyahang gitug-an sa pulis nga sayo palang sa buntag niini giplanuhan na niya ang maong krimen. Na recover sa kapulisan ang gunting ug ang talinis nga kahoy nga gigamit sa pagpatay. — IBM BANAT NEWS
- Latest
