33 tindahang namaligya’g pekeng mga Louis Vuitton gironda

CEBU, Philippines — Milyones ka pesos nga balor sa mga nagkalainlaing pekeng produktong Louis Vuitton (LV) ang gipangsakmit sa mga sakop sa National Bureau of Investigation sa usa ka mall sa Mandaue City.  Si John Ignacio, hepe sa Intellectual Property Rights Division sa NBI Manila miingon nga mao pa ni ang unang operasyon nga ilang gihimo sa Cebu batok sa mga pekeng LV products sa gawas sa Metro Manila.  Ang 40-man team sa NBI armado og 33 search warrants batok sa 33 ka mga tindahan sa maong mall nga namaligya og pekeng LV.

“We confiscated fake LV bags, shoes, watches, wallets, belts and other personnal accessories,” matud ni Ignacio. Matud niya ang mga tagiya sa maong mga tindahan pangkasohan og paglapas sa Intellectual Property Code of the Philippines.

Niadtong bulan sa Agosto, nakadawat ang ilang buhatan og reklamo gikan sa LV-Hong Kong bahin sa dayag kaayong pagpamaligya og mga pekeng LV products sa maong mall sa Mandaue City. Duha ka adlaw nilang gisusi ang maong mga tindahan ug nag-test buy sila niadtong Septiyembre ug gipakita sa representante sa LV dinhi ug nasuta nga mga peke gyud kini hinungdan nga gilusad ang operasyon.

“Siyempre ‘yung peke na LV bag merong P2,500, may P5,000 or even P20,000.  Pero yung original na LV bag can range from P100,000 to a million,” matud ni Ignacio.

Usa sa mga tagiya sa girondang tindahan miingon nga nakurat sila sa kalit nga pagdagsa sa mga ahente sa NBI. Gawas sa pekeng LV products, namaligya sab ang maong mga tindahan og uban pang mga luxury brands sama sa Hermes, Dior, Gucci, Bottega, Balenciaga, Fendi, Channel, Prada, ug uban pa nga gituohang pulos sab peke.

“Hindi sila kasali kasi ‘yung manufacturer/ niyan, hindi naman sila nagreklamo. Yung LV lang ang nag file nang complaint, kaya yung mga fake products lang nila ang na seized namin,” ni Ignacio pa.  Matud pa niya, ang pagpamaligya og pekeng imported nga produkto makaguba sa ekonomiya sa nasud, mas maayo pang mamaligya sila og local brands. — IBM BANAT NEWS