MICS makig-alayon sa Telcos alang sa 911 Emergency

CEBU, Philippines — Makig-alayon ang Management Information and Computer Services (MICS) sa mga telecommunication company aron masumpay na ang mga serbisyo sa 911 Emergency Command Center sa Siyudad sa Sugbo.

Ang 911 Emergency Command Center gilusad kini niadtong Septiyembre 30, 2024 ug padayon nga gipaningkamutan sa MICS nga masugdan na ang ilang operasyon aron sa dali nga pagtubag og mga emerhensiya, medikal, ug kalamidad sa 80 ka barangay sa siyudad. Si Conrado “Tads” Ordesta III, acting head sa MICS nagkanayon nga ang kuwang nalang sa ilang buhatan mao ang interconnection.

Ang interconnection mao kini ang nagsiguro nga ang mga manawag og tabang gikan sa Cebu City makaderetso sa ilahang linya ug dili na moagi sa Emergency 911 sa Manila.

Padayon karon ang ilang negosasyon sa mga telecommunication company diin niabag niini ang Next Generation Advanced nga mao ang nihatag og ekipo, training ug sestema alang sa pagsuporta sa pagpadagan sa 911 hotline system.

Matud ni Ordesta nga kong hingpit na kini nga ma-activate mahimo na nga makontak ang 911 Emergency Command Center ni bisan kinsa, bisan og wala kini nakakonektar sa mobile data o bisan og wala pay load ang motawag.

Ang maong command center mao kini ang labing una dinhi sa Rehiyon 7 ug giklaro ni Ordesta nga eksklusibo una ang ilang pagresponde ngadto sa mga lumulupyo sa Dakbayan sa Sugbo.

Apan gipanglantawan ni Ordesta nga adunay posibilidad nga malugwayan nila ang ilang pagresponde sa laing mga local government unit sa Sugbo ug modepende lang kini sa negosyasyon tali sa mga mayor nga gusto nga makig-alayon sa maong command center.

Sa pagkakaron, ang 911 Emergency Command Center anaa nahimutang sa ikaduhang andana sa Legislative Building sa City Hall ug mamahimo kini nga modawat og mga tawag-tabang pinaagi sa C3’s emergency hotline nga 166/262-1424, 0932 537 7770 o 0917 839 9896. — BDB BANAT NEWS