NBI giawhag pag-imbestiga sa mayor sa Dalaguete

CEBU, Philippines — Usa ka concern citizen nga residente sa Lungsod sa Dalaguete ang nidangop sa buhatan sa National Bureau of Investigation Central Visayas aron sa pag-awhag niini nga imbestigahan ang road concreting project sa lungsod nga giingong adunay mananaog nga private bidder apan gitrabaho sa kagamhanan sa lungsod.

Kagahapon sa buntag si Engineer Ildebrando Almagro nidangop sa NBI-7 aron sa pagpaabot sa iyang hangyo sa maong buhatan nga mohimo ug imbestigasyon batok kang Mayor Ronald Sesante ug pipila ka mga department head tungod sa road concreting project nga  ang pundo niini gikan sa Department of Public Works and Highways ug adunay winning private contractor apan gitrabaho kini sa kagamhanan sa lungsod.

Si Almagro nipadayag sa iyang kahibulong nga unta adunay pribadong winning bidder apan ang gigamit sa trabaho nga iyang nakita ang ekipo sa lungsod sama sa backhoe, dump truck ug uban pa.

Gibutyag ni Almagro nga human nigawas ang taho nga gipasakaan og reklamo ngadto sa NBI-7 ang mayor sa lungsod sa  pipila ka mga tawo diha na siya nakabaton og kaisog nga modangop usab sa maong buhatan aron ipadangat ang iyangg reklamo ug mahimoan kini og imbestigasyon tungod kay susama ra gihapon kini ug pamaagi sa unang kaso nga nasang-at.

Si Almagro nagkanayon nga bag-o ang road concreting apan wala kini maayo sa pagtrabaho tungod kay nanggawas ang mga graba.

Giklaro ni Almagro nga walay bulok pamolitika ang iyang pagduso og reklamo tungod kay dili man siya magpapili  sa umaabot nga eleksiyon ug ang iyaha mao lang ang pagpangita sa kamatuoran isip usa ka tax payer.

Si Almagro naglaom nga mahatagan kini og pagtagad sa NBI-7 nga maoy iyang giduolan tungod kay nisalig siya sa integrity sa maong buhatan. Ang kampo ni Sesante wala pa mohatag og komento kalabot sa maong pasangil batok kaniya. (BANAT NEWS)