Mga sakyanan gikan sa POGO hub gisusi ang mga tag-iya

CEBU, Philippines — Nagpadala og request ang Cebu Police Provincial Office (CPPO) ngadto sa Highway Patrol Group (HPG)-7 alang sa record check sa mga sakyanan nga na-recover gikan sa giingong POGO hub sa usa ka resort sa Sitio Kalingking, Barangay Saavedra, Lungsod sa  Moalboal. Sayo pa, ang Criminal Investigation and Detection Group Central Visayas apil ang ubang unit sa Philippine National Police niimplementar sa warrant to search, seized, and examine computer data niadtong Oktubre 14, 2024 diin gikompiska ang computer sets, laptops, cellphones ug mga sakyanan nga gigamit sa nadiskubreng 38 ka undocumented Chinese nationals.

Matud ni Police Lieutenant Colonel Wilbert Parilla, hepe sa HPG-7 nga unom ka sakyanan diin tulo niini ang nakuhaan na nila og records sama sa ilang plaka hinungdan nga makig-alayon sila sa Land Transportation Office (LTO)-7 aron mailhan ang mga tag-iya niini.

Samtang ang laing tulo ka sakyanan ang wala pay mga assigned plate hinungdan nga mo-request sila sa dealer aron mahibaw-an kon asa o kinsa ang gihatan nila sa plaka.

Nasayran nga human makuha sa HPG-7 ang tanang impormasyon ilaha kining ipadala ngadto sa CPPO kinsa maoy nipadala sa request.

Ang maong lakang kabahin sa nagpadayon nga imbestigasyon sa kapolisan pagkompirma nga POGO ang nag-operate sa maong dapit. (BANAT NEWS)