P25 bilyones iduso nga annual budget sa probinsiya

CEBU, Philippines — Moabot sa P25 bilyones ang iduso nga annual budget sa Probinsya sa Sugbo sunod tuig ug ang maong "proposed budget" mas dako itandi sa P23 bilyones nga pundo karong tuiga.

Gipadayag kini ni governor Gwendolyn Garcia atol sa joint council meeting sa Provincial Development Council (PDC), Provincial Peace and Order Council (PPOC), Provincial Anti-Drug Abuse Council (Padac) ug sa Provincial Disaster Risk Reduction and Management Council (PDRRMC) niadtong Oktubre 15.

Apil sa iduso nga pundo sunod tuig mao ang P14 billion nga Annual Investment Plan (AIP) nga giaprobahan usab sa PDC.

Ang AIP sa 2025 mas dako og P2 bilyones sa P12 billion nga AIP karong tuiga.

Isumitir ang AIP sa hunta probinsyal alang sa pagreview ug aron maaprobahan isip kabahin sa proposed budget sunod tuig.

Ang AIP maoy basehan sa gastohanan nga mga programa ug proyekto sa Probinsya sa Sugbo.

Matud sa Budget Officer nga si Danilo Rodas P3.8 billion niini ang alang sa health ug medical services pagpalambo sa mga gidumala nga tambalanan sa Probinsya lakip na ang pagpalit og dugang ekipo ug paghire og dugang personnel.

Laing P3.5 billion ang alang sa pagpatukod og dugang dalan, taytayan ug solar street lighting projects; P3.3 billion ang alang sa bulk water system sa 25 ka LGUs; P1.2 billion ang pagpatukod ug lambo sa mga pampubliko nga buildings ug ubang "vertical structures"; P400 million ang sa agricultural, veterinary, ug environmental facilities; P350 million sa airport ug seaport reclamation samtang P200 million ang sa pagtukod og drainage systems, slope protection, ug flood control structures.

Ang cultural restoration ug development gigahinan usab og P150 million samtang laing P100 million ang pagpalit og mga sakyanan lakip na ang ambulansya ug emergency response units.

Ang bag-ong nalakip sa AIP mao ang P1 billion nga alang sa power generation ug electrification program sa isla sa Malapascua sa Daanbantayan nga mi-take over ang Kapitolyo sa paghatag og suplay og kuryente sa isla. (BANAT NEWS)