Mga deboto gidapit sa pagsalmot sa grand solemn procession
CEBU, Philippines — Gidapit ang tanang mga deboto sa pagsalmot sa grand solemn procession sa imahen sa Divine Mercy ug sa mga Santos nga nahimong kabahin sa balaanon nga kalooy sa Ginoo sama nila ni Santa Faustina ug St. John Paul II.
Gikatakda kining ipahigayon karong Oktubre 19, 2024 alas 4:30 sa kadlawon diin magsugod kini diha sa uptown area hangtud na sa Basilica Minore del Santo Niño.
Nasayran nga mao kini ang culmination sa 5th Asian Catholic Congress on Mercy nga tambongan 2,000 ka deligado gikan sa nagkadaiyang dapit sa Asya.
Sama sa naandan nga Walk with Mary ug Walk with Jesus gilaoman nga modagsa ang mga deboto nga mosalmot sa procession.
Matud ni Monsignor Marnell Mejia, in-charge sa solemn foot procession nakig-alayon na sila sa kapolisan alang sa kasigurohan sa peace and order ug sa Cebu City Transportation Office alang sa pag-manage sa karsada nga subayon sa procession.
Ug nakig-alayon usab sila sa City Disaster Risk Reduction and Management Office ug sa uban pa nga line agencies.
Si Harold Alcontin, pangulo sa CDRRMO nagkanayon nga andam na sila alang sa maong kalihokan diin nakapahigayon na sila og walkthrough uban sa mga kaparian sa Archdiocese of Cebu, nagkadaiyang line agencies ug mga volunteer.
Dugang ni Alcontin nga nagpahimutang na usab sila og team nga maoy nag-facilitate sa nagpadayon nga kalihokan sa simbahan diha sa International Eucharistic Congress diin tak-opan kini pinaagi procession. BDB BANAT NEWS
- Latest
