DWUP mopasaka og kaso batok sa kanhi nila opisyal

CEBU, Philippines — Mopasaka og kaso ang Division for the Welfare of the Urban Poor (DWUP) batok sa usa sa mga kanhi opisyal niini tungod sa giingong pagdumili sa pag-turn over niini sa mga importanteng dokumento kalabot sa Slum Improvement and Resettlement (SIR) program sa Siyudad sa Sugbo.

Gipugngan una sa DWUP ang pangalan sa maong kanhi opisyal ug matud ni Atty. Ronald Anthony “Butch” Librando, executive director sa DWUP nga kasamtangang gitun-an pa nila ang mga posibleng kaso nga ilang ipasaka batok sa kanhi pangulo sa SIR.

Matud ni Librando nga nausa ang buhatan sa DWUP ug SIR niadtong tuig 2013 ug iyang gimandoan ang maong opisyal nga i-turnover ang mga dokumento sama sa ledgers, balance sheets, subdivision plans, resibo nga kalabot sa status sa pagbayad sa 1,800 ka SIR beneficiaries nga nagpuyo sa upat ka barangay nga mao ang Pasil, Suba, Sawang Calero ug Sitio Alaska sa Mambaling.

Apan giingong wala na siya tagda sa maong opisyal hangtud sa niaging buwan dihang ni-apply na kini alang sa pagretiro.

“Before ni retire siya, weeks before nangayo siya sa among admin officer og clearance. I instructed the admin officer nga dili ko mohatag og clearance until ma-turnover niya tanan documents (related to SIR beneficiaries)”, padayag ni Librando.

Apan giingong ang nahisgutang kanhi opisyal niapdayag ngadto sa sakop ni Librando nga ipagawas lang niya ang mga dokumento kon mopirma sila sa iyang retirement clearance.

Ug gumikan niini, si Librando niluwat og written order ngadto sa retiradong opisyal alang sa pormal nga pag-turnover sa mga dokumento apan giingong nagdumili kini sa pagpirma sa maong order.

Giigong ang maong kanhi opisyal nipagawas kini og mga dokumento apan dili kini kompleto.

Si Librando nagkanayon nga ang kapakyas sa opisyal sa pag-turnover sa tanang kompletong dokumento ngadto sa iyang buhatan mahimong makalangan sa pagproseso sa mga titulo sa beneficiaries sa SIR nga nakabayad na sa ilang mga bayranan gani uban kanila ang nakahuman na og bayad. (BANAT NEWS)