Cesante wala na matingala sa kiha batok niya

CEBU, Philippines — Gihulagway ni Dalaguete Mayor Ronald Cesante nga ang kaso nga gipasaka batok kaniya karon sa National Bureau of Investigation Central Visayas (NBI-Cevro) usa ra ka pang-atake kaniya ug  sa kalamboan sa lungsod karon nga nagkaduol na ang eleksyon.

Kalapasan sa Anti-Graft and Corrupt Practices Act; Reckless Imprudence Resulting to Homicide as Penalized under Art 365 in relation to Art 249 of the Revised Penal Code ug Grave Misconduct as penalized under 6713 (Code of Conduct and Ethical Standards of Public Officials and Employees)( except respondents who are private individuals) ang gisang-at sa NBI batok ni Cesante ug sa ubang opisyal sa munispyo ngadto sa Ombudsman.

Kini may kalabotan sa kamatayon ni Jerson Enseñales nga namatay samtang nagtrabaho sa usa ka proyekto sa lungsod sa Dalaguete. Sumala sa NBI nga si Enseñales namatay tungod kay matod pa kulang sa safety equipment gear sa construction site. Wala pa nadawat sa mayor ang kopya sa maong reklamo, apan nagkanayon nga andam kini niya atubangon.

Si Cesante nagkanayon nga dili kini unang higayon nga gikiha siya samtang padulong na ang piniliay.

"Dili coincidence nga kining mga akusasyon ning tumaw karong padulong sa piniliay," matud ni Cesante . "Lisod ang kontra nga naay milyones, way pake sa kalambuan sa lungsod ug sa mga lumolupyo, ug andam mobayad og Facebook Trolls," dugang sa mayor.

Nipasalig si Cesante sa mga Dalaguetnon nga dili magsilbi kaniya ang 'hugaw nga pamaagi" aron lang gub-on ang pila ka tuig nga panerbisyo niya sa lungsod.

"These attacks are merely to discredit the progress we've built together isip usa ka naghiniusa nga Lungsod" matod sa Mayor.--  IBM BANAT NEWS