Nagpraktis og soccer naigo og kilat

CEBU, Philippines — Duha ka mga lalakeng menor de edad ang naangol human maigo sa kilat samtang dunay practice game sa duwa nga soccer sa Sitio Danawan, Barangay Liburon, Dakbayan sa Carcar kagahapon sa alas 3 sa hapon, Biyernes, Oktubre 11, 2024.

Ang mga bata nag-edad og 15 anyos ug 16 anyos, ang duha pulos nagpuyo sa Sitio Kalindoy sa maong barangay.

Sa impormasyon sa Carcar City Police Station nakadawat sila og tawag gikan sa Carcar Provincial Hospital ug nagpahibawo labot nahitabo sa duha nga naigo sa kilat ug gidala sa maong tambalanan.

Miadto dayon ang kapulisan sa ospital ug nahinabi niini ang 15-anyos nga batang lalake.

Misaysay kini nga duna sila practice game apan kalit lang sila nakadungog og kusog nga tingog nga gituohang iya sa kilat ug niigo sa kayutaan.

Nawad-an dayon silang duha panimuot ang duha ka mga biktima ug nakaangkon og kadaot sa kalawasan. Gani nangagisi-gisi ang ilang mga gisuot nga sinina ug shorts.

Ang mga opisyales sa Barangay Liburon nidala sa duha sa Carcar Provincial Hospital apan ang 16 anyos kansang sapot nagisi-gisi gibalhin sa Vicente Sotto Memorial Medical Center sa dakbayan sa Sugbo.-  IBM BANAT NEWS