SK kagawad nadakpan sa buy-bust

CEBU, Philippines — Nadakpan ang usa ka Sangguniang Kabataan (SK) councilor sa Barangay Sto. Niño sa Cebu City human kini napalitan og ilegal nga drugas didto sa Purok Repolyo, Barangay Poblacion, Dakbayan sa Talisay niadtong Miyerkules sa kaadlawon.

Ang dinakpan mao si Klent John Intoma alyas Cadi, 23. Nadakpan kini sa mga sakop sa Drug Enforcement Unit (DEU) sa Syudad sa Talisay  atol sa buy bust operation ug nakuhaan og 25 gramos nga gidudahang shabu nga gibana-bana nga P170 mil ang kantidad.

Matud pa nga duha ka semanang gipanid-an ang suspek ug nasuta nga makabaligya kini og 50 gramos matag semana.

Si Kapitan Lourdes Ramirez sa Barangay Santo Niño sa Cebu City miangkon nga wala na siya makurat sa pagkasikop niini tungod  kay kaniadto napriso na sab ang maong batan-on tungod gihapon sa ginadili nga drugas.

Matud niya nakabantay na sila nga pirme kining makapalit og bag-ong gadgets ug mga mahalong butang.

Giawhag ni Ramirez ang tanan mga trabahante sa barangay nga dili gayud mag-apil-apil sa illegal nga drugas.

Samtang nadakpan sa mga operatiba sa Philippine Drug Enforcement Unit(PDEA) Regional Special Enforcement Team ug Cebu City Police Office Station 6 ang usa ka regional target-listed individual sa buy-bust operation sa Sitio Mahayahay 2, Barangay Calamba, Siyudad sa Sugbo sa miaging adlaw.

Ang suspetsado mao si Huberto Nadela, 55, residente sa naasoy nga dapit. Nasakmitan ang suspetsado og 50 gramos sa gituohang shabu nga nagkantidad og P340 mil, buy-bust money, cellphone ug ubang non-drug evidence. – IBM BANAT NEWS