Kapin 6.8 milyones narehistro sa National ID sa Central Visayas

CEBU, Philippines — Ang Philippine Statistics Authority Regional Statistical Services Office VII (PSA RSSO VII) nakarehistro na og kapin sa 6.8 milyones ka indibidwal sa Central Visayas sa National ID system.

Sumala sa PSA-7, Sa Hunyo 30, 2024, niabot na sa 6,888,186 ka mga Filipino sa rehiyon ang malampusong narehistro para sa National ID system diin nagrepresentar kini og 97.8 porsyento nga kalampusan sa target nga 7 milyon ka rehistrasyon karong tuiga.

Nag-una ang Cebu nga adunay 4,356,932 nga rehistrasyon, gisundan sa Negros Oriental nga adunay 1,243,816, Bohol nga 1,191,348, ug Siquijor nga adunay 96,090.

Sa tibuok rehiyon siete, 4,412,780 na ka National ID cards ang ilang na-isyu ug nadeliber ug 2,390,047 na ka National ID nga papel ang ilang na-isyu. Pasalig sa ahensya nga magpadayon sila sa pag-isyu sa maong ID.

Ang PSA-7 padayon gihapon sa pagparehistro sa National ID sa Central Visayas, diin ang pinakabag-o nilang inisyatiba nagtutok sa pagparehistro sa mga bata nga nag-edad uno hangtud kuwatro anyos.

Nakigtambayayong usab sila sa Department of Information and Communications Technology (DICT) ug nilusad sa Digital National ID, nga ma-access pinaagi sa mga computer o smartphones ug magsilbing balido nga pruweba sa pagkatawo alang sa mga transaksyon, ubos sa authentication.

Naghatag ang PSA og sayon nga rehistrasyon pinaagi sa pag-walk-in sa mga gitudlong sentro sa rehistrasyon o pinaagi sa mobile registration teams sa mga probinsiya aron mahatagan og kahigayonan ang tanan nga marehistro sa National ID. — MEL BANAT NEWS