Bise mayor sa Carcar nitapon sa laing grupo

CEBU, Philippines — Magpapili pagbalik pagkamayor sa Dakbayan sa Carcar si Mayor Patrick Barcenas apan lahi na ang iyang bise mayor sa sunod tuig nga piniliay human si Bise Mayor Efren Quijano nitapon ngadto sa laing grupo. Si Barcenas makig-tandem kang Atty. Perkins De Dios diin dungan sila nga niduso sa ilang certificate of candidacy (COC).

Sayo pa, si Quijano nga kauban ni Barcenas kaniadto nipadayag nga wala na siya makasabot sa pagdumala ni Barcenas sa Dakbayan sa Carcar hinungdan sa iyang pagtapon ngadto sa grupo ni kanhi mayor Mercy Apura.

Ang ilang grupo maoy nag-una sa pagduso sa ilang COC.

Samtang usa ka 73-anyos nga marine engineer nga si Raul Gabijan ang magpapili usab pagkamayor sa siyudad. Niduso usab sa iyang COC ang independente nga kasamtangan nga barangay konsehal sa Barangay Valladolid nga si Laurence King Quijano.

Niapil usab si Isidro Alberca sa pagpapili pagka-konsehal sa siyudad ingon man si Bonie Yam-id. — BDB BANAT NEWS