Cortes ug Ouano magbangga pag-usab

CEBU, Philippines — Duha ka oras sa dili pa ang pagtak-op sa Comelec, ang Team Mandaue pinangulohan sa ilang standard bearer nga si Jonas Cortes niduso sa ilang kandidatora diha Commission on Elections (COMELEC) para sa 2025 midterm elections kagahapon, Oktobre 8, 2024.

Higpit nilang makaatbang ang kampo sa mga Ouano nga nakaduso na sa ilang kandidatora niadtong adlaw nga Lunes. Mao na kini ang ikaduhang higayon nga mag-atbang ang duha gikan niadtong 2007 elections.

Gibanabanang kapin 20 mil ka tawo nga nagsuot og green ug yellow green coded shirts ang niduyog sa martsa sa Team Mandaue padung sa Comelec sa Mandaue City Sports Complex human sa motambong o misa National Shrine of St. Joseph.

Ang “Team Mandaue” nga niduso og COC kagahapon gipangunahan ni Glenn Bercede pagka-bise mayor kauban ang kompleto nilang lineup sa mga konsehal. Una ng ni-file og COC si Cortes niadtong Oktobre 4, 2024.

Si City Treasurer Regal Oliva modagan pagka-kongresista samtang silang Alang-Alang Barangay Captain Jessie James Go ug Councilor Malcolm Sanchez modagan pagka board members.

Naugpot makadiyot ang grupo sa dihang kalit nga ni-withdraw sa iyang kandidatora si board member Glenn Soco human nga gikuha siya nga running mate ni Gob. Gwendolyn Garcia pagka-bise gobernador hinungdan nga naghimo sila og dinaliang tigum.

Giangkon ni Cortes nga nakugang silang tanan niini, apan positibo nila kining gidawat kay dakong dungog para nila nga dunay taga Mandaue nga modagan pagka bise gobernador.

Si Atty. Regal Oliva  sa iyang bahin masaligon nga dako iyang matampo sa Ubos Balay Balauranan ug maayo kini para sa Mandaue.

Iyahang makaatbang si Kongresista Emmarie "Lolypop" Ouano-Dizon. Si Oliva gikonsiderar na nga ni-resign pagka city treasurer ug gihulipan karon sa assistant treasurer Julie Ballesteros. (BANAT NEWS)