Mga karsada sa Talisay gisirad-an nonot sa kalihukan sa pista
CEBU, Philippines — Gisugdan na ang pagsira sa pipila ka mga karsada duol sa simbahan ni Sta. Teresa de Avila sa Barangay Poblacion, Dakbayan sa Talisay.
Kini gumikan sa pagsugod sa nobenaryo sa kapistahan ingon man adunay matag gabii nga kalingawan.
Gumikan niini, si Jonathan Tumulak, pangu sa City of Talisay-Traffic Operation Development Authority (CT-TODA) nipahibawo sa katawhan nga kung mahimo likayan ang mga karsada nga duol sa simbahan sa Sta. Teresa de Avila kung wala man gani kini importante nga adtoan.
Matud pa ni Tumulak nga sugod sa alas 4 sa hapon hangtud mahuman ang kalihukan sirhan ang pipila ka mga karsada palibot sa Barangay Poblacion.
Hinuon aduna silay mga enforcer nga mogiya sa mga sakyanan kay ipatuman man nila ang one way.
Ang pagsira sa mga karsada o pagpatuman sa one way gisugdan niadtong Sabado ug molungtad pa kini sa Oktubre 15 atol sa kapistahan sa Talisay.
Gihangyo sa CT-TODA ang motorista nga patas-an ang ilang pasensya sud sa pipila ka adlaw. (BANAT NEWS)
- Latest
