Duha ka polis nangulata’g dinakpan imbestigahon

CEBU, Philippines — Duha ka polis ang giimbestigar karon apil na ang ilang “police asset” tungod sa matud pa pagpangulata sa usa ka tinun-an criminology nga gipasanginlang nangawat sa balay nga gibantayan sa reklamante.

Ang duha ka mga polis nadestino sa Police Station 4. Si Police Lieutenant Colonel Christian Torres, tigpamaba sa LCPO miingon nga mohimo sila og motu proprio investigation batok sa duha ka mga polis alang sa paagtugkad sa kamatuoran sa reklamo.

Dugang pa ni Torres nga ang maong 20-anyos nga tinun-an nakaangkon og  mga bukol sa iyang ulo ug bun-og sa iyang liog tungod sa gibuhat nga pag-abuso sa duha ka polis kaniya. Matud pa ni Torres caretaker sa usa ka panimalay ang reklamante apan gipasanginlan kini nga niunay og pangawat sa balay nga iyahang gibantayan.

Ang Police Regional Office-7 mimando kang Lapu-Lapu City Police Office Director Colonel Dyann Agustin sa paghimo og imbestigasyon batok sa duha.

Ang maong batan-on midangop kang Lapu-Lapu City Mayor Junard ‘Ahong’ Chan.

Si Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin  miingon nga dili duphan sa PRO-7 ang hiwi nga binuhatan sa ilang mga abusadong sakop.  Kun mapamatud-an nga tinuod ang gibuhat sa duha, bisan sa alegasyong nangawat ang reklamante, mahimo gihapon silang mapahamtangan og kasong kriminal ug administratiba tungod sa pagabusar sa ilang otoridad.

Hinuon, gitataw ni Pelare nga hatagan og higayon ang mga polis nga makaesplikar sa ilang habig. (BANAT NEWS)