Managsuon gipamusil patay

CEBU, Philippines — Patay ang magsuong construction workers human sila gipamusil og riding-in-tandem diha sa Sitio Abante, Barangay Hingatmonan, Lungsod sa Balamban niadtong Biyernes sa hapon, Oktubre 4, 2024.

Ang mga biktima mao sila si Pil Balbiro Pepito, 38, minyo ug residente sa Barangay Tag-amakan, Lungsod sa Asturias ug manghod niini nga si Samson De Balbero Pepito, 30, nagpuyo sa Sitio Camancelis, Lungsod sa Balamban.

Ang mga mamumuno duha ka lalake nga wala nailhi ug nagsul-ob og itom nga jackets ug sakay og Honda Click nga motorsiklo nga color blue.

Sa impormasyon sa Balamban Police Station alas 4:50 sa hapon sa adlaw'ng Biyernes nakadawat sila og tawag gikan sa concerned citizen ug nagpahibawo labot sa nahitabong pagpamusil sa dapit.

Sa ilang pag-abot sa lugar naabtan sa kapulisan ang mga biktima nga nagbuy-od sa dalan ug naligo sa kaugalingong dugo.

Dali pa sila nga gidala sa Balamban Provincial Hospital sa Emergency Medical Services apan gideklarar ang magsuon nga dead-on-arrival.

Base sa inisyal nga imbestigasyon sa Balamban Police Station ang mga biktima nagtrabaho isip panday sa bag-ong balay nga gitukod.

Nangabot ang mga mamumuno nga sakay og motorsiklo ug gipamusil ang mga biktima gamit ang wala pa matino nga kalibre sa armas, dali sab misibat ang mga lalaki.

Sigon ni Police Lieutenant Colonel Julius Garcia, hepe sa Balamban Police Station nga padayon pa ang ilang imbestigasyon ilabi na sa motibo sa krimen. — /IBM (BANAT NEWS)