Kanhi seaman makig-atbang ni Gov. Garcia

MANILA, Philippines — Usa ka retirado nga seaman ang mihagit karon kang Gobernador Gwendolyn Garcia pagka gobernador sa lalawigan sa Sugbo sa sunod tuig nga eleksyon.

Si Valeriano Gingco, 67 anyos nga taga barangay Baring lungsod sa Carmen miduso sa iyang certificate of candidacy (COC) niadtong Oktubre 4 sa Office of the Provincial Election Supervisor (OPES).

Si Gingco buot magpapili pagkagobernador sa lalawigan sa Sugbo isip usa ka independente nga kandidato.

Isip usa ka retirado nga seaman sulod sa 35 ka tuig, si Gingco nagkanayon nga gusto niya i-aplay ang iyang nakita sa ubang nasud.

Sa interview sa mga sakop sa media, si Gingco miingon nga ang korupsyon maoy usa sa mga isyu nga gusto niya nga mahatagan og kasulbaran.

Hinoon matud ni Gingco nga wala siya mag-expect nga makadaog, apan ang iya nga aduna siyay mapaambit sa kabatan-onan.

Samtang ang ubang mga lokal nga kandidato, niduso na sa iang mga COC ngadto sa Comelec.

Sila si kongresista Rhea Gullas sa primero distrito ug kongresista Janice Salimbangon sa ikaupat nga distrito niduso sa ilang COC kagahapong adlawa didto sa OPEs. Si Salimbangon mihimakak sa pasangil nga wala siyay nahimo nga programa ug proyekto sa ikaupat nga distrito ug suma pa niya nga sa tuig 2023 ngadto sa 2024 pa lang, miabot na sa P5 billion nga kantidad sa mga proyekto ug programa sa imprastraktura sa ilang distrito.

Si kanhi San Fernando Mayor Lakambini Reluya miduso usab sa iyang sertipiko de kandidatora kagahapong adlawa kuyog si Antonio Bacaltos Jr. ug silang duha buot magpapili pagka bokal sa primero distrito ubos sa Nacionalista Party (NP).

Miduso usab kagahapon sa iyang COC si Nelson Mondigo nga tinguha nga molansar pagkabokal sa ikaupat nga distrito.

Samtang miduso usab sa iyang COC si Consolacion Mayor Teresa "Nene" P. Alegado alang sa iyang pagpasubli sa katungdanan sa sunod tuig nga eleksyon.   Dungan usab nga mi-file sa ilang COC ang kompletong line up sa Team Alagad nga naglakip sa iyang tandem nga kandidato sa pagka bise mayor nga mao ang iyang anak nga si kanhi Mayor Joanes "Joyjoy" Alegado . (BANAT NEWS)