Mga sakop sa CT-TODA walay tugotang maka-leave

CEBU, Philippines — Ang mga sakop sa City of Talisay-Traffic Operation Development and Authority (CT-TODA) full force kini sugod niadtong Oktubre 1, 2024.

Kini ang gibutyag ni Jonathan Tumulak, pangulo sa CT-TODA. Matud ni Tumulak nga sa gikan sa opening salvo hangtud na sa kapistahan karong Oktubre 15 niining tuiga wala na siya’y gitugotan nga iyang sakop nga maka-absent ug maka-leave sa trabaho.

Nasayran nga daghan ang kalihokan nga nahan-ay alang sa kapistahan ni Santa Teresa de Avila. Gipanglantawan nga daghang tawo ang modagsa ilabi na sa pagsugod sa nobenaryo sa kapistahan karong adlawa.

Ang kagamhanan sa siyudad nibahin sa mga kalihokan matag gabii aron dili magdasok ang mga tawo.

Makita nga adunay kalihokan diha sa Talisay City Hall ground ingon man sa Barangay Poblacion.

Gihangyo ni Tumulak ang motorista nga maghinay-hinay lang sa pagmaneho ug kong mahimo likayan ang mga lugar diin ipahigayon ang mga kalihokan sa kapistahan.

Subay niini, lumba sa kabayo ang masaksihan sa mga Talisaynon karong adlawa hangtud sa adlaw’ng Domingo.

Si Mayor Gerald Anthony “Samsam” Gullas, Jr. nidapit sa mga Talisaynon o bisan kinsa nga mahiligon sa lumba sa kabayo sa pagsaksi niini diha sa dakong luna atbang sa Talisay City Hall. Ang maong kalihokan naglangkub sa oval race, tartanilla race, barrel race ug obstacle race. Mao kini ang labing una nga Cebu National Horse Show and Competition nga salmotan sa horse clubs nga gikan sa nagkalain-laing Probinsiya sa Pilipinas.

Si Retired General Patrocinio Comendador nga mahiligon usab sa kabayo ang usa sa mga mopakita sa abilidad sa iyang mga binuhi. Ang mga kandidata sa Miss City of Talisay ang mosaksi usab sa kalihokan sa lumba sa kabayo. (BANAT NEWS)