3,000 ka Charismatic nagtigom sa Sugbo

CEBU, Philippines — Gibuksan kagahapon ang nasudnong panagtigom sa nagkadaiyang grupo sa Charismatic lukop nasud dinhi sa Dakbayan sa Sugbo nga gipahigayon diha sa International Eucharistic Congress ug taposon kini sa adlaw nga Domingo.            

Dul-an sa 3,000 ka Charismatic ang nisalmot sa kalihokan nga gitawag og CHARISCON Philippines 2024 ubos sa tema nga "One Charis, One Mission".

Matud ni Fe Mantuhac-Barino, chairman sa Commission on the Laity/CHARIS Philippines Coordinator nga tinguha na nga mapalambo ug mapadilaab ang kainit sa kaikag sa pagtuo ug serbisyo sa mga tawo ngadto sa Ginoo.

Ug maghatag kini og paglaum ilabi na niining panahon karon nga adunay daghang hagit nga giatubang sa katilingban.

Si Barino nagkanayon nga daghan sa mga nanambong sa maong kalihokan ang madasigon ug malipayon kaayo ilabi na unang adlaw pa lang nindot na kaayo ang mga pagtulon-an nga makuha.

Adunay kapin sa 90-anyos ang pangedaron ang nibiyahe gikan sa Mindanao aron moapil sa maong kalihokan. Ang maong kalihokan molanat og tulo ka adlaw diin gipaniguro usab sa kapolisan sa Dakbayan sa Sugbo ang seguridad sa mga delegado. (BANAT NEWS)