COC nilang Mike ug Jonas makanselar?

CEBU, Philippines — Ang Commission on Elections mipahibalo nga ang tanang niduso og certificates of candidacies nga nahukman sa Ombudsman og perpetual disqualification to hold public office gikinahanglang mokuha og temporary restraining order (TRO) sa korte kung dili sila gustong matangtang sa lista sa mga opisyal nga mokandidato sa 2025 midterm elections.

Si Comelec Commissioner George Garcia namahayag niini atol sa interbyu sa One Balita Pilipinas kagahapon dihang siya gipangutana kun unsay mahitabo sa mga nakaduso na og COCs nga nalutsan og desisyon sa Ombudsman og perpetual disqualification to hold public office.

Matud pa niya, dunay Comelec resolution nga ang desisyon sa Office of the Ombudsman base Republic Act 6770 o  balaod nga nagdumala sa Ombudsman nga ang mga desisyon gikan kanila sa mga kasong administratiba, immediately executory.

Hinuon pwede pa kining iapelar, apan agi og pagtahod sa gahum sa Ombudsman kinahanglan nilang sundon ang desisyon nga ‘immediately executory.”

Samtang wala siya mohingalan nilang suspended Cebu City mayor Michael Rama ug Mandaue City suspended  mayor Jonas Cortes kinsa parehong gidesisyonan og dismissal from the service ug perpetual disqualification to hold public office, apan siya nagkanayon nga kadtong moduso pa og COCs nga dunay susamang sitwasyon kinahanglan silang mokuha og TRO.

“ Although hindi pa final, kaya po ang COMELEC bilang pagtalima sa batas at bilang pagkilala sa Office of the Ombudsman ay amin po agad ipapatupad 'yan Ma'am Cheryl (news anchor). Therefore, wala po muna ako particular na kaso na sasabihin. Doon po sa mga magpa-file na may perpetual disqualification to hold public office, kung walang TRO mula sa Court of Appeals laban sa Office of the Ombudsman ipapatupad po 'yan ng Commission on Elections, ika-cancel po namin ang candidacy ng mga kandidatong may perpetual disqualification to hold public office,” matud pa ni Garcia sa maong interbyu.

Ang Commissioner midugang nga kutob lang karong kataposan sa Disyembre ang tagal aron sila makaduso og TRO sanglit sugdan na ang pagprinta sa mga balota.

Kadtong mapakyas pagduso og TRO, tangtangon ilang pangalan sa opisyal nga mga kandidato ug dili maapil sa pagprinta sa mga balota.

Sayo kagahapong adlawa, si Rama mipadayag nga wala siya maapektahi sa maong desisyon ug mipadayag nga “Tuloy and laban.”

Si Rama gi-dismiss sa serbisyo ug perpetual disqualification to hold public office tungod sa kasong nepotismo nga gisang-at batok kaniya wala mohatag og direktang tubag bahin niini kay wala pa siya nakadawat og kopya sa desisyon.

Apan siya miinsister nga walay nahitabo nga nepotismo sa iyang pagserbisyo isip mayor sa dakbayan sukwahi sa gipasangil kaniya nga iyang gi-hire ang duha ka igsuon sa iyang asawa isip kawani sa City Hall.

Giklaro ni Rama nga daan nang trabahante ang iyang duha ka bayaw sa panahon pa sa duha ka administrasyon nga iyang gisundan.

Si Rama nipasabot nga dili niya maato pagbasa ang tanang dokumento nga gipasa kaniya sa HR kung ugaling napirmahan man niini ang mga kontrata sa mga kawani sa City Hall.  Si Rama kompyansa nga makalusot sa kaso.

Samtang ang abogado ni Rama nga Atty. Collin Rosell miingon nga buhaton nila ang tanang legal remedies. Lakip niini ang pagduol sa Court of Appeals o modiretso sa Korte Suprema.

Si Rama nibutyag nga politika ang nagpaluyo sa nahitabo karon kaniya hinoon wala na kini mohatag og pangalan kun kinsa.  Apan gipahibalo niya nga mas nadasig siya nga mopadayon sa iyang tinguha nga mopadayon sa serbisyo.

Si Rama miduso sa iyang COC adlaw nga Huwebes sa tinguha nga magpasubli pagka Mayor.

Samtang si Mandaue City suspended Mayor Jonas Cortes sa iyang bahin, nag-inusara nga miduso sa iyang COC isip kandidato sa pagka mayor alas 8:08 ang takna sa kagahapon sa buntag Septiyembre 4, 2024.

Matud pa niya iya kining gihimong aron pagpakgang sa mikatap nga mga huhungihong nga dili na siya makadagan sa 2025 midterm elections.           

Para niya ang gipakanaug nga desisyon (sa Ombudsman) dili pa final ug kasamtangan karon nilang gihimo ang tanan nga mga legal nga pamaagi.

Apan kuyogan niya ang iyang tibuok Team Mandaue lineup sa ilang pag-file og COC alas-3 sa hapon sa Septiyembre 8 human sa ilang pagtambong sa National Shrine of Saint Joseph. (BANAT NEWS)