Naglalis tungod sa drugas, gipatay sa iyang nakasumbagay
CEBU, Philippines — Patay ang usa ka 27-anyos nga lalaki human kini gipusil sa gikasinumbagay niya diha sa sulod sa sam-ang sa Barangay Calamba, siyudad sa Sugbo, Miyekules sa gabii, Oktubre 2, 2024.
Ang biktima mao si Frances Jake Padayao, 27 anyos, nagpuyo sa naasoy nga dapit kinsa giingong nagsulod-gawas na sa prisohan tungod sa mga petty crimes kaniadto.
Sa report sa Sawang Calero Police Station 6 sa Cebu City Police Office(CCPO) ang biktima ug suspek kansang pangalan gipugngan samtang padayon nga gipangita, nagkasumbagay gawas sa sam-ang.
Human sa ilang pagsumbagay nisulod ang biktima menteryo ug nagpundo og pila ka oras apan gikatahong niapas sa sud ang suspek ug diretso nga gipusil ang biktima sa ulo nga miresulta sa hinanali niining kamatayon. Nagkanayon si Police Captain Jay-R Palcon, hepe sa Sawang Calero Police Station 6 nga parehong mga ‘drug personalities’ ang biktima ug suspetsado .
Gani giingong ang hinungdan sa pagsumbagay sa duha, gailog matud pa sa pusil ug ‘item’ sa sulod sa plastic nga gituohang shabu.
"Dinakpan na ni ang victim diri station sa una, ang kani pud na suspect bag-o ra laya, last month nakagawas ang suspect," sigon ni Palcon. Na-recover sa kapulisan ang empty shell sa .9mm nga armas ug usa ka tooter.
Si Dr. Ester Concha, ang kapitan sa barangay Calamba nitug-an nga ilahang tabangan ang pagpahiluna sa biktima human nidangop sa ilang buhatan ang apohan niini ug nagpakitabang aron mapahiluna kini ug masulod na sa lungon.
Gawas sa pagtabang sa lungon, motabang usab ang mga opisyal nga mokoot sa ilang kaugalingon nga bulsa nga itunol ngadto sa nagbangutan nga banay para adunay magamit sa paghiluna sa namatay. (BANAT NEWS)
- Latest
