Binaliw landfill target maka-recycle og 90 porsiyento gikan sa basura

CEBU, Philippines — Gikatakdang ilusad sa Prime Integrated Waste Solutions Inc. (PWS) ang ikaduhang processing line sa ilang pasilidad diha sa Barangay Binaliw, dakbayan sa Sugbo nga gipaabot nga makapapaspas ug makapadaghan sa marekober ug ma-recycle gikan sa mga basura.

Atol sa pagbisita ni Cebu City Acting Mayor Raymond Garcia sa pasilidad niadtong Septiyembre 20, mipadayag kini og kahinam sa paglusad unya sa ikaduhang processing line nga gilauman nga magamit karong umaabot Disyembre ug kini matud pa nitanyag nga mangulo sa ribbon-cutting ceremony sa maong proyekto.

Si Garcia, inubanan nila ni Konsehal Pastor Alcover Jr., Edgardo “Jaypee” Labella, ug Joel Garganera, nibisita sa pasilidad aron personal makita ang operasyon niini, sumala sa pahayag sa PWS.

Matud pa sab sa PWS namatikdan ni Garcia ang mga mahinungdanong mga kalamboan  sukad nakuha sa PWS ang pasilidad gikan sa miaging operator niini nga ARN Central Waste Management Inc. niadtong Enero 2023.

Naobserbahan matud pa sa mayor, ang madala ra ang baho sa palibot nga di na kinahanglang mag facemask mao nga gidayeg niya ang doble paningkamot sa PWS sa pag-spray sa kemikal aron makontrol ang baho.

Nakita sab niya ang Materials Recovery Facility (MRF) ug gipahibalo kini bahin sa gisugdan paghimo nga ikaduhang processing line ug ang bag-ong gi-upgrade nga wastewater treatment plant.

Hinuon, si Garcia nangayo sa PWS og report  sa ilang short-term ug long-term nga mga estratehiya aron matubag ang mga gireklamo sa mga tawo ilabi na panahon nga kusog ang uwan.

Ang PWS nagtinguhang 80 ngadto sa 90 porsiyento sa mga basurang dad-on kanila ang ilang ma-recover ug ma-recycle aron gamay nalang gyud ang mga biya niini nga itambak diha sa ilang landfill.—  IBM BANAT NEWS