Operasyon sa Cleft Care sa CCMC buksan na
CEBU, Philippines — Magsugod na og operate ang Cebu Comprehensive Cleft Care sa Cebu City Medical Center (CCMC) nga naa mahimutang sa ikapitong andana sa maong ospital. Himoon ang soft opening karong Septiyembre 28, 2024 agi og pagpangandam usab sa grand opening nga gikatakda na karong Nobiyembre 16.
Karong Sabado, ang Operation Smile Philippines modawat og 100 ka mga pasyente aron ipaubos og operasyon. Dili lang unya pag-opera ang serbisyo sa OSP, apan lakip na sab ang konsultasyon ug “comprehensive care” sa mga pasyente, sama sa pag-monitor sa ilang pagkaon, dental care, ug uban pa.
Sa mahitabong grand opening karong Nobiyembre, tambungan kini sa mga dagkong opisyal sa Operation Smile International lakip na ang founder niini nga sila si Dr. William (Bill) Magee, Jr., nga usa ka plastic surgeon, ug iyang asawa nga si Kathleen (Kathy) Magee.
Motambong sab ang founder ug chairperson sa Mariquita Salimbangon Yeung Charitable Foundation, Inc. (MSYCFI) nga si Mariquita S. Yeung, Operation Smile Phils.
Ang Operation Smile International 26 ka tuig na sab nga nakipagtambayayong sa MSYCFI alang sa mga serbisyo niini.
Samtang gikalipay ni acting Cebu City Mayor Raymond Alvin Garcia nga dunay himoon nga pagpang opera sa mga dunay deperensya sa baba o bungi.
Dugang pa ni Garcia, gipaabot nalang usab niya ang bidding nga ipahigayon aron sa pagtapos sa maong tambalanan ug kun anaa na ilaha gilayon kini iduso sa winning contractor.
Gitug-an usab ni Garcia nga magpaabot usab siya sa City Council nga magtugot kaniya nga magpirmahay sila uban sa Cebu Medical Society alang sa kalambuan sa CCMC. (BANAT NEWS)
- Latest
