15-anyos gilugos sa uyab

CEBU, Philippines — Midangop sa Sibonga Police Station ang usa ka lola kay gireklamo ang duha ka lalake nga iyang gipasanginlang milugos sa iyang 15-anyos nga babayeng apo niadtong Domingo, Septiyembre 22, 2024.

Base sa report sa Sibonga Police Station pasado alas 4 sa hapon sa samang adlaw ang biktima mialegar nga ang usa sa mga suspek nga si alyas Mar, 23 anyos, mi-chat niya nga makigkita niya sa abandonadong balay diha sa ilang dapit.

Wala mosugot ang biktima apan giingong gipadayon ni alyas Mar ang iyahang plano ug giingnan ang biktima nga dad-on niini ang uyab sa biktima nga si alyas Rey, 22 anyos, tungod niini nisugot ang biktima ug niadto sa maong nahisgutang abandonadong balay ug nagpaabot.

Niabot ang mga suspetsado ug nisunod sila sa biktima sa abandonadong balay. Si alyas Mar giingong nagpundo sa sala samtang ang biktima ug uyab niini nisulod sa kwarto ug didto giingong gihimo sa duha ang patagay sa lawasnong kalipay.

Dihang padung na mag-ilis si alyas Rey giingong naabot ang apohan ug misinggit sa ngalan sa biktima. Mikaratil matud pa og dagan ang duha ug naabtan sa apohan ang biktima nga padung magsul-ob sa panty ug shorts niini.

Gumikan kay mi-report man ang apohan sa kapulisan dali kining giaksyunan sa otoridad nga miresulta sa pagkasikop sa duha ka mga suspetsado.  Naapil si alyas Mar gumikan kay nahulog kini matud pa nga kunsabo sa pag-abuso sa biktima.

Giklaro sa Cebu Police Provincial Office nga bisan og managuyab ug dunay pagtugot ang 15-anyos sa nahitabo makonsiderar gihapon kadto nga rape tungod kay menor de edad pa kini ug kalapasan kini sa balaod.

“Pwede gyud siya ma file-an og kaso considering minor gyud siya, however maskin nagsabot pa sila dili gyud pwede since she is still a minor,” sigon ni Police Major Ian Macatangay, tigpamaba sa Cebu Police Provincial Office(CPPO). (BANAT NEWS)