Barangay workers ipaapil sa hatagan og Christmas bonus

CEBU, Philippines — Nimando na si acting Cebu City Mayor Raymond Alvin Garcia sa Local Finance Committee nga iapil sa Supplemental Budget No. 3 ang Christmas bonus alang sa tanang mga honorarium-based barangay workers ug sa mga magtutudlo sa daycare sa syudad.

Apan gitataw ni Garcia nga moagi pa ang maong mando sa konseho aron ipaubos og deliberasyon ug kun ma-aprubahan na kini, ihatag dayon kining maong bonus.

Tinguha ni Garcia nga mahatagan og bonus ang mga honorarium-based barangay workers ug ang mga magtutudlo sa daycare gumikan kay dako gyud kini og papel sa mga buluhaton sa komunidad gawas sa City Hall.

Atol sa gipahigayon nga Family Day 2024 sa mga daycare workers ug mga child development workers niadtong Septiyembre 22, 2024 sa Family Park, Barangay Talamban, gipadangat ni Garcia ang iyang dakong pasalamat.

“Salamat kaayo sa inyong gibuhat para sa atong mga bata kay nahibaw bitaw gyud mo nga ang atong mga bata maoy kaugmaon sa atong dakbayan sa Sugbo ug maoy mopuli diri kanamo isip mga leader sa atong pinalanggang siyudad”, matud pa ni Garcia.

Sa laing bahin, kasamtangang gihulat sa konseho ang mga dokumento sa Supplemental Budget No. 3 (SB 3) karong tuiga gikan sa Local Finance Committee. (BANAT NEWS)