Garcia miinspeksyon sa PWS-Cebu landfill

CEBU, Philippines — Kagamhanan lokal sa Dakbayan sa Sugbo nga gipangulohan ni Acting Mayor Raymond Alvin Garcia mipahigayon og ocular inspection sa usa ka pribadong labayanan og basura sa Barangay Binaliw subay sa kabalaka sa mga molupyo tungod sa baho ug epekto sa tubig sa maong dapit.

Kauban nila ang pipila ka mga sakop sa konseho sa siyudad, pangulo sa Cebu City Health Department, City Environment Office ug Cebu City Disaster Risk Reduction Management Office pagsulod sa Prime Wasteland Solutions Inc.  Nakigkita sila sa mga opisyal sa pasilidad ug gisusi ang proseso sa Material Recovery Facility (MRF) dunay mga makinaryang migaling sa mga tone-toneladang basura. Sunod gisusi ang landfill sa ibabaw nga bahin sa MRF.

Atol sa tigom gipadangat nila ang mga isyu nga gireklamo sa mga tawo ug ang giingong resulta sa water quality nga wala makapasar sa testing sa tinubdan sa tubig sa maong dapit.

Bukas ang management nga lingkuran ug solusyonan ang mga sugyot sa siyudad.

Gipakita sa management ang water filtration o treatment facility diin giproseso ang hugaw nga tubig nga ilang gi-recycle.

Gidoble sab ang chemical spraying ug tubig sa lugar aron makontrol ang baho sa basura.

Si Garcia kauban silang Konsehal Edgardo ‘Jaypee’ Labella, Joel Garganera ug Pastor Jun Alcover Jr. nakamatikod nga “tolerable” ra ang alisbo sa baho sa basura atol sa inspeksyon.

Ang PWS Cebu kapin usa ka tuig palang nipuli pag-operate sa maong pasilidad ug gikan sa pagsugod naghimo na sila og rehabilitasyon niini sumala pa ni Cara Peralta, presidente sa PWS-Cebu.

 “What's unique then about this facility is that it's a brown field, meaning we acquired a landfill that was already operating. And then we took it upon ourselves to do the rehabilitation,” matud ni Peralta. Pun-an kini og ikaduhang MRF aron mas daghan pa silang maprosesong basura ug sa sunod buwan mo-operate na ang gi-upgrade nga wastewater treatment facility.

“We don’t necessarily really blame you because you just acquired this from the previous (management),” pagklaro pa ni Garcia atol sa tigom, ug midugang nga ang pasilidad nakatabang sab sa siyudad kay dunay kalabayan sa basura niini.

Gitambagan sa mayor ang PWS Cebu nga makigalayon sa mga molupyo ug ipakita nga makatabang sila kanila pinaagi sa operasyon niini sa maong lugar. “Let them feel that you’re here. Let them feel your presence, that’s very important. They have to feel that you’re here, that you’re willing to help them that this is a joint effort between you and them,” pagdasig pa sa mayor. Paabuton ni Garcia sa sunod semana ang gisaad nga report sa management bahin sa ilang mga gipanghimo.

Ang pasilidad gi-acquire sa PWS Cebu gikan sa ARN Central Waste Management Inc. (ACI) niadtong Enero 2023.  Tinguha nilang himuon kining modernong MRF aron maka-recover ug maka-recycle og 80 ngadto sa 90 porsiyento sa mga basurang dad-on didto. (BANAT NEWS)