Walay labot ang lungsod-Garcia

CEBU, Philippines — Giklaro ni Cebu Gobernador Gwenodlyn Garcia nga walay kalabotan ang iyang pagkagobernador ug ang lokal nga kagamhanan sa Probinsya sa Sugbo bahin aning utang nga pabayran kaniya ngadto sa usa ka international nga banko.

Atol sa iyang press conference kagahapong adlawa, si Garcia uban sa iyang legal counsel miklaro sa maong isyu human nipagawas og desisyon ang Korte Suprema niadtong Disyembre 2023 (apan giupload ug napagawas sa publiko sa Supreme Court pinaagi sa ilang website  karon lang bulana) nga pabayron si Garcia og $700,000 nga damage og 12% nga  legal interest gikan Hulyo 2000 ug P404, 560. 50 nga legal cost ngadto sa Hongkong and Shanghai Banking Corp (HSBC).

“This issue really should have not been brought out in light of my being governor of Cebu. Way labot ang lungsod,” matud ni Garcia.

Sumala pa niya ang maong utang gikan pa sa tuig 1996 sa dihang di pa siya gobernador ug negosyante pa siya didto sa Ormoc City.

Ang maong loan alang sa usa ka barge nga iyang gipalit para sa iyang Gwen Garcia Codilla (GGC) Corp. nga moabot og $900,000 kaniadto ug aduna pay 14% nga interest.

Sumala sa gobernador aduna silay $200, 000 nga deposito sa banko, maong mahulog nga ana ra sa $700, 000 ang utang.

Apan sa paglabay sa panahon ang exchange rate sa dolyar ug piso nisaka ang interest gikan 37% ngadto sa 40% mao nga dili na maato sa pagbayad.

“If you were a rational-minded businesswoman, would you risk throwing away all of your businesses to pay this what has now become onerous..? matud ni Garcia atol sa presscon uban ang mga sakop sa media.

Ang HSBC mipasaka og kaso kang Garcia ngadto sa Regional Trial Court (RTC) Makati Branch 57 ug mi-award kanila ang RTC og $890, 347. 92. Ang maong kaso miabot ngadto sa Court of Appeals (CA) kon diin gipaubsan niini ang bayad ngadto sa $700, 000 pabor sa HSBC.

Gi-contest kini sa kampo ni Garcia. "This award was contested by our client since it had no basis (Gov. Gwen actually put up a collateral that was worth more than the award) and especially since HSBC wanted to enforce collection at already a ridiculous sum of Two Million Eight Hundred Thousand US Dollars (2,800,000 USD). This is the case that we challenged and elevated to the Supreme Court," sumala sa counsel ni Garcia.

Sumala sa gobernador, aduna pay kolateral nga iyang gitanyag alang sa maong utang, duha ka luna nga moabot sa 15 ngadto sa 20 ka ektarya ang gilapdon nga mas mahal pa sa kantidad sa gipaningil sa maong banko.

Apan matud pa wala kini dawata sa HSBC, butang wala masabti sa gobernador.

Ang kampo sa gobernadora nagkanayon nga ang HSBC miduso og “Petition to Revive Judgement” apan gibasura sa RTC hinungdan nga midangop sa Court of Appeals ang maong bangko ug hangtod karon pending pa.

“From the foregoing facts, it is very clear that there is no real, imminent threat of enforcement of any civil liability against Gov. Gwen Garcia,” sumala ni Atty. Alex Avisado Jr. ang legal counsel ni Garcia.  BANAT NEWS