MAMSER forum: Guidelines ug ethical standards aron way masilo

CEBU, Philippines — Gipahigayon kagahapon ang "MAMSER: Improving Media Reporting on Gender" forum  nga kabahin sa 32nd Press Freedom Week diha sa Marcelo B. Fernan Cebu Press Center, Barangay Lahug, Dakbayan sa Sugbo kagahapon.

Tumong sa maong forum aron hatagan og gibug-aton ang papel nga gihuptan sa media alang sa pagpasiugda ug pagkab-ot sa gender inclusivity ug equality.

Ang maong  forum gipangulohan kini sa mga panelists nga gilangkuban ni Atty. Archill Capistrano, coordinator sa Office of Anti-Sexual Harassment sa UP Cebu College, Atty. Ian Vincent Manticajon, Lawyer-journalist ug miyembro sa Cebu Media Legal Aid (Cemia), ug Chase Go, founder sa Transman Equality and Awareness Movement.

Si Jude Bacalso, usa ka food and travel journalist ug producer maoy speaker sa forum samtang si Jason Baguia, usa ka journalist, researcher, ug PhD candidate sa Communication Sciences (Media Narratives and Cultural Memory) sa Universidade Catolica Portuguesa maoy moderate sa forum. Si Capistrano nitumbok sa iyang diskusyon nga ang media adunay gahum nga makaimpluwensiya sa uban.

Ug tungod niini ang mga journalist kinahanglan molikay sa pag-misgender kung mag-report tungod kay posibleng makapasakit kini sa usa ka tawo.

Matud ni Capistrano nga ang identity sa usa ka tawo kinahanglang respetohon ug adunay mga paagi aron kini buhaton sama sa paggamit og honorifics, titulo, ug pronouns. Samtang si Go nagkanayon nga aron mapalambo ang inclusivity panahon na nga usbon sa media sa Pilipinas ang paggamit sa pinulongan sa pagtumong sa gender sa mga tawo.

Sa iyang bahin, si Manticajon nipadayag nga ang trabaho sa usa ka journalist dili lang sa pag-report sa mga kamatuoran apan sa pagsiguro nga ang mga kamatuoran ipresentar sa usa ka paagi nga nagpakita og dignidad sa tawo.

Iyang gidasig ang mga editors  sa newsroom nga maghimo og mga polisiya ug guidelines base sa ethical standards sama sa paggamit sa respetado nga pinulongan ug pag-promote sa responsible storytelling.

Gisugyot usab ni Manticajon nga ang mga journalist kinahanglan hatagan og training sa gender sensitivity aron makat-on gikan sa mga lokal nga insidente ug masiguro nga andam sila sa pag-atubang sa mga sitwasyon kalabot sa gender. (BANAT NEWS)