Kakuwang sa tubig reklamo sa taga Brgy Sambag Dos

CEBU, Philippines — Dul-an gatos ka mga molopyo sa dili mominos tulo ka sitio sa Barangay Sambag 2 Dakbayan sa Sugbo, ang nireklamo tungod kay tagsa ka oras lang ang agas sa tubig sa ilang dapit.

Ang Banat News/DyRF1215 tuyo nga nibisita sa maong dapit diin nakita ang kahimtang sa mga residente nga nagdaginot lang sa ilang gipundo nga tubig.

Usa ka trabahante nga si Christian Lim, miingon nga hasol kaayo ang ilang sitwasyon nga magsag-ob og tubig sa pundohanan sa ilang giabangan nga balay apan wa silay mahimo gawas sa pag-adjust na lang.

Dugang pa sa maong residente nga naa silay koneksyon sa tubig sa MCWD apan usa ka oras ra ang agas panahon sa kaadlawon nga tingkatulog pa unta nila.

Ang mga residente sa dapit mitug-an nga ang maong problema ilang nasinati niadto pang panahon sa pandemic ug matag bayad nila sa ilang bill sa MCWD ilang ipadangat ang ilang suliran apan way aksyon. 

Ang mga residente nga nireklamo naggikan sa sitio San Roque, Kawayan ug Inahan sa Kanunayng Panabang.

Usa ka Jerwin Parojinog, nitug-an problemado gayud sila kung walay agas tungod kay maapektahan man usab ang ilang panginabuhian ilabi na ang kan-anan.

Nabalaka usab ang mga residente nga mokatap ang dengue tungod sa pagpundo nila og tubig. Ang tigpamaba sa MCWD Minerva Gerodias nibutyag nga posibleng adunay problema ang linya sa tubig sa maong dapit.

Ang maong dapit usa unta kini sa makabenipisyo sa tubig gikan sa lusaran dam.

Gipasalig ni Gerodias, nga aksyonan gilayon ang gipadangat nga yangongo sa mga tawo og ipasusi na usab kini nila sa ilang mga personnel. (BANAT NEWS)