Banat News correspondent midaog sa CAMMA

CEBU, Philippines — Midaog ang Banat News Correspondent nga si Rowena Capistrano sa Print and Online Category for News Writing sa labing una nga Metropolitan Catholic Mass Media Awards (CM-CMMA).

Dakong garbo kini sa mantalaan gumikan kay nagdakaiyang probinsya sa Central Visayas ang misalmot sa prestihiyoso nga pagpasidungog sa mga sakop sa media.

Gisaysay ni Capistrano nga wala niya damha nga mapilian siya sa maong pasidungog. Gani, na-engganyo siya nga mosumiter sa iyang mga nasuwat nga mga balita kabahin sa mga panghitabo sa simbahan.

14 ka tuig na si Capistrano isip tighatod og balita ngadto sa katawhan og dakong kalipay niya nga mapasidunggan ang iyang pamaagi sa pagpangalagad sa publiko nga mohatod og matinud-anon ug makahuluganon nga balita ngadto sa kinabag-an.

“Mao gyud ni akong gina-look forward. Sauna pa gyud ko ganahan moapil. Sauna, gitawag man ni siya og CAMMA unya para nako lahi gyud sa feeling og makadawat ka og award gikan sa CAMMA”, suma pa ni Capistrano.

Dakong pasalamat ni Capistrano ngadto sa Kahitas-an nga nadungog ang usa sa iyang mga pag-ampo nga adunay makakita sa tumong sa iyang trabaho. Dugang pa nga mapasalamaton sab siya sa Banat News kay nahimo kining luna aron mapakatap ang maayong balita sa simbahan.

“Ganahan ko nga ipakita kung unsa ang mga kalihukan sa simbahan ilabi na karon nga naglipana na ang kagubot ug kasamok. Might as well, naa tay balita sa simbahan ilabi na kadtong mga nindot nga nahimo sa simbahan.” dugang pa ni Capistrano.

Gikatakda nga modawat sa maong award si Capistrano karong Septiyembre 29, 2024 sa SM Seaside sa Dakbayan sa Sugbo. (BANAT NEWS)