Motor nasampak sa poste driver patay

CEBU, Philippines — Patay ang drayber sa motorsiklo samtang angol ang angkas niini human nawad-an og brakes ang gisakyan nilang motorsiklo samtang nagdulhog ug nalahus og kabangga sa poste sa barangay road sa Sitio Upper Cambotete, Barangay Luka, Lungsod sa Oslob, Lunes sa hapon, Septiyembre 16, 2024.

Ang nakalas mao si Rolando Dival, 45, residente sa Barangay Daan Lungsod ug maoy driver sa motorsiklo samtang angol ang angkas niini nga si Jose Catipay Regudo Jr. nga silingan sa namatay.

Sa imbestigasyon sa Oslob Police Station ang mga biktima padulong unta mopalit og mga materyales sa paghimo og puso sa tubig.

Samtang nagdulhog ang motorsiklo gikatahong kalit nawad-an og brakes ang motorsiklo, isum-ok unta ni Dival sa daplin sa karsada ang motor apan naapikihan kini kay nakabuylo na ang dagan padulhog.

Pag-abot sa kurbadahon nga bahin sa dalan wala na makaliko ang motor ug nasampak kini sa poste nga miresulta nga nangalabay silang duha ug nakaangkon og grabeng kadaut sa kalawasan.

Ang motorsiklo nalahus og kahagbong sa pangpang nga dunay gilawmon nga 10 ngadto na sa 20 metros ug didto nasunog.  Gidala sa tambalanan ang duha apan gideklarar kining dead-on-arrival samtang ang angkas kay gibalhin sa ospital sa Cebu City kagahapon sa buntag. --  IBM BANAT NEWS