P5.5 milyones nga livelihood assistance gihatag sa DOLE

CEBU, Philippines —  Nihatag og kinatibuk-ang P5.5 milyones nga livelihood assistance ang Department of Labor and Employment Region 7 (DOLE-7) ngadto sa 259 ka informal sector workers sa Cebu ug Bohol atol sa Bagong Pilipinas Serbisyo Fair- “Handog ng Pangulo, Serbisyong Sapat Para Sa Lahat".

Ang serbisyo fair nga gipahigayon atol sa selebrasyon sa adlawng natawhan ni Presidente Ferdinant R. Marcos, Jr., dungan nga gilusad sa upat ka mga venue sa Probinsya sa Sugbo ug Bohol diin nikabat sa PHP5,541,779.52 ang gi-release nga hinabang.

Sa probinsya sa Sugbo, 83 ka informal sector workers gikan sa Santander ug Bogo City ang nakadawat og PHP2.4 milyones nga tabang panginabuhian.

Sa lungsod sa Santander, 40 ka konstituwente gikan sa nagkalain-laing barangay ang nakabenepisyo sa P1.2 milyones ug sa dili madugay mahimo na silang maka-operate sa ilang Integrated Livelihood Project.

Samtang sa Anonang Sur, Bogo City, 43 ka self-employed workers ang magsugod og Organic Swine Raising human makadawat og P1,260,000.00 gikan sa DOLE-7.

Sa ubang bahin, sa Bohol, 176 ka mga indibidwal ang nakabenepisyo sa kapin sa PHP3 milyones nga assistance package.

Ang P1.6 milyones niini gigahin sa 113 ka mga miyembro gikan sa tulo ka giilang asosasyon sa mga trabahante sa lungsod sa Mabini alang sa ilang Marine Bangus Culture, Hog Raising, ug Seaweeds Farming.

Samtang sa Talibon, anaa sa 63 ka mga ginikanan sa mga child laborers sa Barangay San Jose ang nakadawat og PHP1.5 milyones nga hinabang alang sa ilang chicken egg production nga negosyo.

Isip kaabag sa DOLE -7, ang mga local government units (LGUs) sa upat ka nahisgutang lugar maoy magpatuman sa mga proyekto ug mo-canvass ug mopalit sa mga kinahanglanong materyales. (BANAT NEWS)