Bag-ong opisina sa CPD nagkantidad og P29.4 milyones

CEBU, Philippines —  Moabot sa P29.4 milyones ang pundo nga gigahin sa gisugdan na karon pagtukod nga bag-ong opisina sa Commission on Population and Development (CPD) o kanhi Population Commission o PopCom.

Ang maong edipisyo sa CPD anaa gitukod sa DA Compound sa may dalan M. Velez sa dakbayan sa Sugbo. Ang maong luna gipanag-iya sa Probinsya sa Sugbo.

Si acting Governor Hilario Davide III maoy nitambong sa groundbreaking ceremony sa duha ka andana nga pasilidad nga nahimutang sa 1,008 metro kwadrado nga luna sa Kapitolyo.

Kuyog ni Davide sa maong kalihokan mao ang CPD Central Office Finance and Management Division Chief Administrative Officer nga si Fatima Corpuz ug CPD 7 Director Atty. Bruce Ragas.

Ang CPD-7 kasamtangang nahimutang sa 501 metro kwadrado nga luna sa Kapitolyo sa may Gov. M. Cuenco Ave. SA Brgy. Banilad, dakbayan sa Sugbo. Apan tungod kay ang maong propedad duol man sa Cebu IT Park, ang Kapitolyo nihangyo sa CPD-7 ug ubang ahensya sa gobyerno nga mobalhin sa laing luna nga gipanag-iya niini sama sa DA Compound, aron ang maong luna sa Banilad mapalambo sa Kapitolyo pinaagi sa "income-generating economic enterprises". (BANAT NEWS)