Mga biyahe sa barko gikanselar na sab

CEBU, Philippines — Laing pagkanselar sa byahe sa mga barko ang gihimo sa pipila ka mga kompaniya  kagahapong adlawa tungod gihapon sa dili maayong lakaw sa panahon.

Sa abiso sa Cebu Port Authority (CPA), apil sa mga nagkanselar og byahe sa barko mao ang Poro Port ngadto sa Liloan Pier 88 pinaagi sa Shuttle Ferry sa alas 2 ug alas 5:30 nga byahe; Cebu ngadto sa Ormoc nga ala 1 nga byahe pinaagi sa Oceanjet; Toledo ngadto sa San Carlos, Negros Island; Cebu ngadto sa Getafe, Bohol; Cebu ngadto sa Tagbilaran; Cebu ngadto sa Ormoc pinaagi sa Supercat; Punta Engano ngadto sa Santa Rosa Port, ug Hagutapay Port padulong Pilar, Ormoc.

Ang LCT Lite Ferry 28 mikanselar pud sa byahe niini gikan Taloot, Argao padulong sa Loon, Bohol.    Ang Coast Guard Station Southern Cebu mihatag pud og pagkaon sa mga na stranded nga mga pasahero kagahapon didto sa evacuaton center sa Barangay Mainit sa lungsod sa Oslob, habagatang Sugbo.

Kagahapong adlawa, nipagawas og gale warning ang Philippine Atmospheric Geophysical Astronomical Services Administration (PAGASA) tungod sa kusog nga hangin nga dala sa Southwest Monsoon.

Apektado niini ang Southern Seaboard sa Southern Luzon ug seaboard sa Visayas sama Romblon, Capiz, Iloilo, Negros Oriental, Guimaras, Siquijor, Cebu, Bohol, Southern Leyte, ug Leyte.

Sumala sa PAGASA nga mabaluron nga kadagatan ang masinati sa maong mga lugar hinongdan nga adunay pagkanselar sa byahe sa mga barko hilabina ang mga gagmay nga sakayan nga pandagat.

“Sea travel for small seacrafts (including all motor bancas of any type or tonnage). Mariners of these vessels are advised to remain in port or seek safe harbor. For larger vessels, operating in these conditions required experienced and properly equipped vessels,” sumala sa PAGASA. (BANAT NEWS)